Қыркүйекте Қызылорда өңіріне 52 мың тоннадан астам көмір жеткізілді
Қызылорда облысы бойынша меншікті тілші
Жергілікті тұрғындардың қыс маусымында көмір отынына сұранысын қамтамасыз ету үшін аймақ теміржолшылары ағымдағы жылдың мамыр айынан бастап жұмыс жасап жатыр. Биылғы жылу маусымына қажетті 192,8 мың тонна қатты отынның қыркүйек айындағы есебі бойынша 52,1 мың тоннасы кестеге сәйкес жеткізіліп, аймақтағы отын қоймаларына түсірілген.
Көмірдің жеткізілуі бөлімше мамандары мен мониторинг тобының күнделікті бақылауында. Қызылорда ЖТ бөлімшесі директорының логистика жөніндегі орынбасары Мейрамбек Шолтабаев аймақтағы отын қоймаларында көмір отынының жеткілікті екенін, тұтынушылар сұранысы толық қанағаттандырылып отырғанын атап өтті.
– Аймақ тұрғындарының 2024-2025 жылдардағы жылу маусымына қажетті деп белгіленген 192,8 мың тонна, оның ішінде 28,3 мың тоннасы коммуналды-тұрмыстық қажеттілікке, ал 164,5 мың тоннасы жергілікті тұрғындардың баспаналарын жылытуға керек қатты отын биыл мамыр айынан бастап тасымалданып жатыр. Қазіргі таңда аймақтағы барлық отын қоймаларында әр станцияның жергілікті тұрғындарына керекті көмір отыны кезексіз, кедергісіз беріліп жатыр. Отын қоймаларындағы көмірдің көлемі, оның тұтынушыларға түсіріліп, тиелуі бөлім мамандары мен мониторинг тобының бақылауында, – деді Қызылорда ЖТ бөлімшесі директорының логистика жөніндегі басшысы Мейрамбек Шолтабаев.
Бұған дейін көмірді пайдаланып келген аймақ тұтынушыларының көгілдір отын – газға көшірілуіне байланысты қатты отынға деген сұраныс біршама азайғаны байқалады. Мысалы былтырғы жылдың мамыр-кыркүйек айлары аймақ қоймаларына 37,6 мың тонна көмір түсірілген екен.
Жалпы, аймақ бойынша 40 шақты көмір түсіретін кірме жол Сексеуіл, Арал теңізі, Қазалы, Жосалы, Жалағаш, Тереңөзек, Шиелі, Жаңақорған, Қызылорда және Белкөл станцияларында орналасқан. Ондағы отын қоймаларында көмірдің мол қоры бар. Қатты отын «Шұбаркөл көмір», «Восток угольпром», «Жалын», «Қияқты көмір», «Майкубен», «Уголный ресурс» және «Богатырь көмір» секілді көмір кендерінен келісім бойынша желтоқсан айының соңына дейін тасымалданады.
