Астық тиеген вагондар Достық арқылы жөнелтіледі
«Қазақстан теміржолшысы» газетінің тілшісі
Алтынкөл станциясында кідіріп қалған қазақстандық астық тиеген вагондар Достық станциясы арқылы қайта бағытталмақ. Вагондар кідірісін жоюды көздеген шара тиісті орындар тарапынан келісім тауып отыр.
«ҚТЖ» ҰК» АҚ мамандарының айтуынша, жағдайды тұрақтандыру мақсатында жүк жөнелтушілерге Алтынкөл – Қорғас өткеліндегі жүк тасымалын Достық шекаралық өткелі арқылы қайта бағыттау ұсынылған. Бүгінде жүк жөнелтушілер 30-дан астам пойыздың қайта бағдарлануына келісімдерін растаған.
Еске сала кетсек, қазақстандық фермерлер Қытайға астық экспорттауда проблемаға тап болған еді. Соңғы екі айда фитосанитарлық, карантиндік сертификаттар мен кедендік декларацияларға қатысты проблемалар болып, Қытай тарапы 360 астам вагонды кері қайтарған болатын. Бұл 25 мың тоннаға жуық жүк еді. Қытайдың Бас кеден басқармасы астық тиелген контейнерлерді тексеру уақытын 5-тен 10 тәулікке дейін ұзартып, шекарадағы тексеру үдерісін ұлғайтқан болатын. Соның салдарынан Қорғас станциясының қытай жағында қазақстандық астық тиеген 2500 астам контейнер жиналып қалып, үлкен кезек пайда болды. Осыған байланысты ұлттық компания контейнерлерге астық тиелімін реттеуге мәжбүр болып отыр.
Сонымен қатар Орталық Азияға да астық жөнелтілімі өткен жылмен салыстырғанда 30 пайызға өскен және ол бүгінгі таңда 1 млн тоннадан астам астықты құрап отыр.