Қаржылық табыс артты

Кәсіпорынның қаржы-экономикалық көрсеткіштері оның өнімді сату немесе қызмет көрсету арқылы тапқан табысына байланысты екені белгілі. Темір жолда ол негізінен тасымал арқылы көрінеді.

Атырау жүк тасымалы бөлімшесі басшысының қаржы және экономика жөніндегі орынбасары Мұрат Жүгінісовтің мәліметіне сәйкес, аймақта пойыз тасымалына сұраныс та, мүмкіндік те мол. Былтырғы жылы бөлімше негізгі қызметтен 93 млрд 3 млн 293 мың теңге табыс тауып, жоспар 102%-ке орындалған. Оның ішінде тасымалдаудан түскен табыс 75 млрд, локомотивтік тартудан түскен кіріс 14 млрд, қосымша алымдардан түскен кірістер 2 млрд теңгеден астам қаржыны құраған. Қосалқы көмек кірісінің қызметі 954 млн 510 мың теңгені құрады, бұл бағытта тауар кассирлері, пойыз құрастырушылар сырт мекемелерге қызмет көрсетеді, кеңсе жалға беріледі, т.б. Сондай-ақ, локомотивтерді жалға беру, ағымдағы ағыту-жөндеу қызметі арқылы да, яғни вагондарға қызмет көрсету-жөндеу негізінде жақсы қаржылық нәтижеге қол жеткізілген.  

«Теміржолшылардың жалақысы жыл сайын артып отыр. Бір адамға шаққандағы жалақы жоспар бойынша 526 465 теңге, нақты 652 727 теңге, жоспардан 7% немесе 36 262 теңгеге артық. Жалақы 2024 жылғы 1 қаңтардан бастап 7% өсті және ТЧЭ, ВЧД, қызметкерлеріне қаңтардан, бөлімше қызметкерлеріне 2 тоқсаннан КТУ премиясы төлене бастады», – дейді қаржы маманы.  

Тасымалдау процесіндегі жұмысшылардың еңбек өнімділігін арттыру жоспар бойынша 86% немесе 706 мың тонно-км кем, өткен жылмен салыстырғанда 97% немесе 134 мың тонно-км кем. Орындалмауы – жұмыс көлемінің 15% кем болғанына байланысты. Негізгі қызмет шығындары бойынша жоспар 37 млрд 947 млн 590 мың теңге, нақты 39 млрд 493 млн 995 мың теңге. Артық шығыстардың себептері – жалақының өсуі және сыйақы беріле бастауы т.б. Еңбекақы қорының өсуінен әлеуметтік аударымдар да артқан, ал шығысты үнемдеуге келсек, материалдар – 391 млн 534 мың теңгеге, жанар-жағар май – 1 млрд 469 млн 555 мың, электр энергиясы – 87 млн 147 мың теңгеге үнемделген.