ТХКБ бойынша ауыл шаруашылығы өнімдерін тасымалдау өсті
Астанада "KTZ Express" АҚ (ҚТЖ еншілес компаниясы) және Shandong Hi-Speed Group – көлік және логистикалық инфрақұрылым саласындағы ірі қытайлық компаниялардың бірі басшылығының кездесуі өтті, деп хабарлайды Rail-news.kz.
Келіссөздер барысында тараптар жүк тасымалдау көлемін ұлғайту, ынтымақтастықты кеңейту және жаңа логистикалық шешімдерді енгізу перспективаларын талқылады.
Кездесудің негізгі тақырыптары: Транскаспий халықаралық көлік бағдары (ТХКБ) бойынша ауыл шаруашылығы өнімдерін тасымалдау көлемінің өсуі; Орталық Азия елдеріне контейнерлік пойыздар санының артуы; тасымалдау тиімділігін арттыру үшін екі деңгейлі контейнерлерді пайдалану мүмкіндіктері болды.
Келіссөздер Қазақстан мен Қытайдың көлік-логистикалық байланыстарды нығайтуға және мультимодальды маршруттарды дамытуға деген өзара қызығушылығын растады.
Компаниялар 2024 жылдың желтоқсанында қол қойылған стратегиялық серіктестік туралы келісім аясында ынтымақтастықты жалғастырады.
KTZ Express және Shandong Hi-Speed Group бірлескен логистикалық жобаларын дамыту Қазақстан мен Қытай арасындағы жүк ағынын ұлғайту үшін, сондай-ақ елдерді халықаралық көлік тізбектеріне интеграциялау үшін жаңа мүмкіндіктер ашады.