Әйелдер қауымы қысқы бақта бас қосты
«Қазақстан теміржолшысы» газетінің тілшісі
Арулар мерекесі қарсаңында «ҚТЖ-Жүк тасымалы» ЖШС Әйелдер кеңесі арнайы марапаттау іс-шарасын өткізді. Кеңестің екінші отырысына жиналған серіктестіктің қыз-келіншектері ҚТЖ бас ғимаратындағы Қысқы бақта бас қосты.
Әйелдер қауымына серіктестіктің бас директоры Владимир Петров, бас директордың локомотив шаруашылығы бойынша орынбасары Асан Үмбетов, бас директордың корпоративтік мәселелер бойынша орынбасары Марал Марасилов ақ тілектерін арнап, құттықтау сөз сөйледі. Олар биылғы жылды Президент Қ.Тоқаев «Жұмысшы мамандықтар жылы» деп жариялауына орай өзінің адал қызметі, кәсібилігі мен еңбекқорлығының арқасында жетістіктерге жетіп жүрген әйелдер қауымын марапаттауды лайық көргендерін жеткізіп, бірқатар теміржолшы әйелдер мен сала ардагерлері Құрмет грамоталары және Алғыс хаттармен марапатталды.
Олардың қатарында Астана локомотив пайдалану депосының зейнеткері, 43 жыл салаға еңбегі сіңген Людмила Красноштанова, осы депода 27 жыл еңбек еткен Шарбүбі Қуанышбаева, Ақмола бөлімшесінде 39 жыл еңбек еткен зейнеткер, Құрметті теміржолшы Күләш Абдулина сынды майталмандар бар. Сонымен қатар қазіргі таңда теміржолдың дамуы жолында табанды еңбек етіп, ер азаматтармен қатар жөндеуші, слесарь сынды ауыр да жауапты жұмыстарды атқарып жүрген нәзік жандар да болды. Солардың бірі – Екібастұз локомотив пайдалану депосында локомотивтерді жөндеу және қарау бойынша слесарь болып еңбек ететін Алмагүл Нұрмахина Құрмет грамотасына ие болды.
– 1994 жылдан бері осы жұмысты атқарып келемін, яғни биыл еңбек өтіліме 31 жыл болады. Менің міндетіме электровоздың дөңгелек жұптарын майлау кіреді. Бұл – өте жауапты жұмыс. Себебі дөңгелек жұптар майланбаса, вагондар рельс үстінде жүре алмайды. Оның өзінің майлау көлемі, есебі, реті болады. Соның бәрін талаптарға сай істегенде ғана қауіпсіздікке нұқсан келмейді. Отбасымда ұлым және інім теміржолда істейді. Жұмысқа да, үйге де үлгеру үшін еңбекқор болу аз, ширақтық қажет әрі өз жұмысыңды жақсы меңгеруің керек. Ал үйде әйелсің, анасың, отбасыңның жағдайын жасай білу – парыз. «Әйелдің қырық жаны бар» деп бекер айтқан ба, біз сондай бесаспап жандармыз, – деп күлді Алмагүл.
