Қытайдан Әзербайжанға аттанған алғашқы жүк пойызы Қазақстан арқылы өтеді
Қытайдың Шаньси провинциясынан Әзербайжан астанасы Бакуге алғаш рет транскаспий бағытымен жүк пойызы аттанды. Бұл оқиға Қытай – Еуропа бағыты бойынша жаңа логистикалық дәліздің іске қосылуын білдіреді. Жаңа маршрут Қазақстан аумағы арқылы өтеді, деп хабарлайды Rail-news.kz.
Пойыз Қытайдың солтүстігінде орналасқан Цзиньчжун қаласынан жөнелтілді. Құрамында жалпы салмағы 1159 тонна болатын 50 стандартты контейнерге тиелген күн батареяларының жиынтықтары бар. Бұл жүк Шаньси провинциясының транскаспий бағытымен алғаш рет жөнелтілген тауар болып отыр.
Маршрут және логистика
Huayuan International Land Port көлік компаниясының хабарлауынша, пойыз «Чжундин» логистикалық орталығынан шыққан. Ол Қазақстан аумағымен жүріп өтіп, Ақтау портына жетеді. Осы жерден жүк Каспий теңізі арқылы пароммен Әзербайжанға жеткізіледі.
Компанияның мәліметінше, транскаспий бағыты дәстүрлі маршруттарға қарағанда жүк тасымалдау уақытын айтарлықтай қысқартады. Бұл тәсіл Шаньси провинциясында өндірілген күн панельдерін Оңтүстік Кавказ, Түркия және Шығыс Еуропа елдеріне жеткізуді едәуір жеңілдетеді.
Huayuan International Land Port қазіргі уақытта Қытай – Еуропа және Қытай – Орталық Азия бағыттары бойынша 23 тұрақты теміржол маршрутын жүзеге асырып отыр. Бұл маршруттар арқылы Шаньси провинциясы әлемнің 16 еліндегі 48 қалаға тікелей байланыс орнатқан.
Сарапшылардың айтуынша, соңғы бес жылда Транскаспий халықаралық көлік бағыты (ТМТМ) арқылы жүк тасымалы көлемі 6 есе өскен. Бұл Қытай, Қазақстан және Каспий маңы елдері арасындағы экономикалық байланыстың нығаюын көрсетеді.
Қазақстан аумағы арқылы өтетін бұл жаңа жүк бағыты Еуразия құрлығындағы көлік логистикасын әртараптандыруға және еліміздің транзиттік әлеуетін арттыруға бағытталған маңызды қадам саналады. Бұл – Қазақстанның халықаралық саудадағы орнын бекітіп, өңірлік хаб ретінде дамуына тағы бір серпін бермек.