Аустрия әлеуетті әріптеске айналады

«ҚТЖ» ҰК» АҚ Инновациялық орталығында Австрия Парламенті Ұлттық кеңесінің екінші президенті Хаубнер мырза бастаған делегациямен кездесу өтті. Тараптар Транскаспий халықаралық көлік бағдарын дамыту перспективаларын, өзара логистикалық іс-қимыл және Қазақстан мен Аустрияның теміржол компаниялары арасындағы әріптестікті нығайту мәселелерін талқылады.

– Қазақстан негізгі көлік магистральдарының қиылысындағы дәліз ретінде Еуропа мен Азия арасындағы стратегиялық мультимодальды позицияны қамтамасыз етіп қана қоймай, одан әрі халықаралық логистикалық бағыттарға қол жеткізуге мүмкіндік береді. Ағымдағы сыртқы үрдістерге байланысты біз Шығыс-Батыс бағыты бойынша да, Солтүстік-Оңтүстік бағыты бойынша да жаңа жүк ағындарын іске қосамыз. Бұл тұрғыда Орта дәліз Каспий теңізі арқылы Қытай мен Қазақстан арасында көліктік қызмет көрсетуді дамытудың басты бастамасы болып табылады. Кешенді жоба теміржол, автомобиль және теңіз бағыттарын қамтиды. Басым бағыттар бойынша көлік инфрақұрылымы жылдам және сенімді тасымалдауды қамтамасыз етеді. Қазірдің өзінде осы дәліз арқылы тасымалдау көлемі екі есе өсті, ал жеткізу уақыты екі есеге жуық қысқарды. Жоба барысында Еуропалық одақпен ынтымақтастықтың үйлестіру платформасы құрылды. Орта дәліз бойынша тасымалдау көлемі оң серпінді көрсетіп отыр, мәселен өткен жылы контейнерлік транзит екі есеге ұлғайды, ал өткен 10 айда транзиттің өсуі 12%-ды құрады, – деді кездесуде сөз алған «ҚТЖ» ҰК» АҚ Басқарма төрағасы Талғат Алдыбергенов.

Ол сондай-ақ ҚТЖ компаниясы ұлттық көлік-логистикалық оператор ретінде теміржол инфрақұрылымын ғана емес, жылжымалы құрамды да жаңартып жатқанын, сонымен қатар Орта дәліз бағытында теңіз флотын нығайтуға ерекше назар аударылып отырғанын атап өтті. Тереңдету жұмыстары аясында Каспий теңізінде тасымалдау көлемін 10 млн тоннаға дейін ұлғайту жоспарланса, бүгінгі таңда «ҚТЖ» ҰК» АҚ Каспийде пайдалану және бірыңғай дәліз бойынша жүк ағындарын қамтамасыз ету үшін 6 кеме сатып алуда.  

Транскаспий халықаралық көлік бағдары жылдан жылға маңызды стратегиялық мәнге ие болуда. Бүгінгі таңда Қытайдан Орта дәліз бойынша 292 контейнерлік пойыз жөнелтілген. Қазақстанның жүк терминалын пайдалана отырып Қытайдың Сиань портында Орталық Азия, Ресей, Закавказье және Еуропа бағыттарында жеделдетілген контейнерлік сервис ұйымдастырылған. PSA компаниясымен бірлесіп «Цифрлық дәліз» бағдарламасы іске қосылды. Алматы қаласында және Ақтау портында жаңа терминалдар жұмыс істей бастады. Әлемдік жетекші компаниялармен ынтымақтастықта ҚТЖ цифрландырудың ауқымды бағдарламасын іске асыруда.  

– Қазақстанның жаһандық жүк ағындарының пайда болуы мен тұтынуының негізгі нүктелерінде болуы, теміржол әкімшіліктерімен және ірі шетелдік әріптестермен тиімді өзара іс-қимыл жасау, заманауи цифрлық шешімдерді енгізу экономиканың өсуіне және Қазақстанның Еуропа мен Азия арасындағы жетекші көліктік-логистикалық хаб ретіндегі ұстанымын нығайтуға ықпал етеді. Біз өзіміздің терминалдық инфрақұрылымды кеңейтудеміз, бұл бағытта біз ÖBB-Holding AG компаниясымен ынтымақтастық орнатуға қызығушылық танытып отырмыз, – деді ҚТЖ компаниясы басшысы.  

Кездесу аясында өңірдің көлік және инфрақұрылымдық жобаларына мүдделі жетекші австриялық компаниялар презентация өткізді. Бұдан кейін ҚТЖ-ның еншілес компаниясы KTZ Express пен Rail Cargo Austria арасында ынтымақтастық туралы Меморандумға қол қойылды. Құжат Орталық және Шығыс Еуропада ÖBB-Holding AG терминалдық инфрақұрылымын бірлесіп пайдалану, ТХКБ бойынша интермодальдық тасымалдау саласындағы ынтымақтастықты дамытуға, сондай-ақ өңірде жаңа терминалдар салу жөніндегі әлеуетті жобаларды қоса алғанда, терминалдық қуаттарды бірлесіп дамыту перспективаларын қарауға бағытталған.