Чунцин – Будапешт бағыты бойынша тұрақты жүк тасымалы басталды
Қытайдың оңтүстік-батысындағы Чунцин қаласынан Венгрия астанасы Будапештке арналған алғашқы контейнер пойызы 2025 жылдың 30 қарашасында жолға шықты. Пойыз Қазақстан аумағы арқылы өтеді, деп хабарлайды Rail-news.kz.
Бұл – Чунциннен Еуропаға ұйымдастырылған тұрақты жүк тасымалының жаңа бағыты. Бұған дейін Чунцин – Дуйсбург (Германия) бағыты бойынша тұрақты сервис іске қосылған еді.
Алашанькоу – Достық шекара өткелі арқылы өткен пойыз Қазақстан, Ресей, Беларусь, Польша, Чехия және Словакияның теміржол инфрақұрылымы арқылы жүріп, шамамен 11 күн ішінде Венгрия астанасындағы Орталық және Шығыс Еуропаны қамтитын ірі көлік-логистика орталығына жетеді. Жаңа бағыт арқылы тұрақты тасымалдың ұйымдастырылуы жүктің жолда болу уақытын бұрынғы жеткізу бағыттарымен салыстырғанда шамамен 30 пайызға қысқартуға мүмкіндік береді.
Қазіргі уақытта Қытай – Еуропа арасындағы тұрақты жүк тасымалы сервисі Еуропаның 26 еліндегі 232 қаланы қамтиды, ал бұл қызмет іске қосылғаннан бері жөнелтілген пойыздар саны 120 мыңнан асты.