ҚТЖ жүк айналымы құрылымында транзиттік тасымалдар 10% алады
«Қазақстан темір жолы» ҰК» АҚ қатынастардың төрт түрімен: республикаішілік, экспорттық, импорттық және транзиттік тасымалдауды жүзеге асырады. Бұл ретте транзиттік тасымалдардың үлесі 10% аспайды, импорттық – 6%, республикаішілік – 56%, ал экспорттық – 28%. Бұл мәліметтер жүк айналымы жалпы құрылымындағы транзиттік тасымалдардың салыстырмалы түрде аз көлемін көрсетеді, деп хабарлайды Rail-news.kz.
Қазақстан Республикасының аумағы арқылы транзиттік темір жол тасымалы дәстүрлі түрде Қытай – Еуропа/Орталық Азия, Ресей/Беларусь – Қытай және кері бағытта, Ресей – Орталық Азия, сондай – ақ ТХКБ және Солтүстік-Оңтүстік дәліздеріменхалықаралық маршруттар бойынша орындалады.
Транзиттік тасымалдар көлемі тұрақты өсуді көрсетуде: 2024 жылы ол 27,5 млн тоннаны құрады, ал 2025 жылдың 11 айының қорытындысы бойынша 27,9 млн тоннаға жетті.
Тасымалданатын транзиттік жүктердің негізгі номенклатурасына мұнай өнімдері, қара және түсті металдар, химиялық заттар, минералды тыңайтқыштар, астық, құрылыс материалдары, темір кені, ағаш, машиналар мен жабдықтар, сондай-ақ азық-түлік жүктері жатады.