Семейде жүк айналымында өсім жоғары

Семейлік теміржолшылар биылғы Тәуелсіздік күні мерекесін жүк тасымалы бойынша толағай табыспен қарсы алып отыр. Жыл басындағы белгіленген жоспарлы жұмыстар мен осыған дейінгі атқарылған өндірістік процестер, жүк айналымын реттеудегі жаңашыл іс-шаралар оң нәтижесін беруде.

Атап айтсақ, өткен он бір айдың қорытындысы бойынша Семей ЖТ бөлімшесіндегі жүк айналымы өткен жылдың сәйкес кезеңімен салыстырғанда біршама өсіп, 9 178,0 млн тонна-км таза жүкті құрады. Тиеу көлемі 16 064,0 мың тоннаға жетті. Бұл жайт өз кезегінде тасымалдау бағыттарының кеңеюіне, соның ішінде Орталық Азия елдеріне астық пен азық-түлік жүктерін жөнелту есебінен орын алыпты. Тиелген жүк ішінде әсіресе дәнді дақылдардың, құрылыс материалдары мен ағаш өнімдерінің үлесі айтарлықтай мол екен.  

Аталмыш мерзім ішіндегі жүк тиеу көлемі өткен жылдың сәйкес кезеңімен салыстырғанда 252,3 мың тоннаға артып отыр. Сонымен қатар өткен жылғы деңгеймен салыстырғанда түсті металл тиеу 234,5 мың тоннаға, темір кенін тиеу 23,5 мың тоннаға, өнеркәсіптік шикізатты тиеу 111,3 мың тоннаға, құрылыс материалдарын тиеу 107,2 мың тоннаға, цемент 83,6 мың тоннаға жоғарылаған. Бұл жүктерді кедергісіз тасымалдаудың маңызы зор. Себебі аймағымыздағы ғана емес, ел көлеміндегі кәсіпорындар, өңдеу нысандарының және құрылыстардың үздіксіз жұмыс жүргізуін қамтамасыз ету қажет.  

Көмір – әлі де бөлімше бойынша тасымалданатын жүктердің ең негізгісі болып саналады. Ағымдағы кезеңде барлығы 5 429 500 тонна қатты отын тасымалданды. Оның 4 833 300 тоннасы ішкі тұтынушыларға жеткізілген екен. Ал 930 600 тоннасы Қазақстанның көптеген аймақтарындағы өнеркәсіптік кәсіпорындарға жөнелтіліпті. Сол тәрізді 596 200 тонна жоғары сұрыпты көмір өзге елдерге экспортталды.  

– Алдағы жылыту маусымына дайындық жыл сайын мамыр айында басталатыны белгілі. Бұл ретте басты әріптес, жүк жөнелтуші «Қаражыра» АҚ-ның бөлімшеге көмір тиеуге арналған бос жылжымалы құрамдарды дер кезінде жеткізу туралы «Қазтеміртранс» АҚ-мен бірлесіп жасаған өтініштері уақытылы және толық көлемде орындалуда. Жүк жөнелтушінің, тасымалдаушының және жүк вагондары иелерінің үйлестірілген іс-шараларының нәтижесінде жылыту маусымының басына дейін жылу орталықтарында отынның минималды қоры жасалды. Ол бүкіл жылыту маусымы бойы сақталады. Бүгінгі таңда Шығыс Қазақстан және Абай облыстарындағы барлық көмір қоймаларында тұрғындарға көмір сату ісі кезексіз және қарбалассыз жүріп жатыр, – дейді бұл ретте жағдайды бақылауда ұстап отырған Семей ЖТ бөлімшесінің басшысы Алмас Сейсемқанов.  

Көмір қорының мол болуы және кезексіз саудалануы тіпті қатты отынның бөлшек саудадағы бағасының төмендеуіне де алып келген. Жалпы, қазіргі таңда көмір тасымалында шығыстағы екі облыста да клиенттер тарапынан шағым жоқ.