Контейнерлік транзит өткен жылдың осы кезеңімен салыстырғанда 44% артты
«Қазақстан теміржолшысы» газетінің тілшісі
Жыл басынан бері транзиттік бағдардағы контейнерлік тасымал көлемі 530 мың ЖФЭ-ден асты. Бұл өткен жылдың алғашқы алты айымен салыстырғанда 44%-ға артық, деп хабарлайды Rail-news.kz. Бұл туралы Орталық коммуникациялар қызметінде «ҚТЖ» ҰК» АҚ басқарма төрағасының бірінші орынбасары Қанат Әлмағамбетов және «ҚТЖ-Экспресс» компаниясының директоры Нұрлан Игембаев және ҚР ИИДМ Көлік комитеті төрағасының орынбасары Жәнібек Тайжанов қатысқан брифингте мәлім болды. Бүгінгі таңда COVID-19 пандемиясына байланысты әлемдегі теміржол тасымалында жүктерді «Есіктен есікке дейін» шартымен жеткізіп беру әдісіне басымдық беріліп отырғаны белгілі. Бұл шарт бойынша жүктерді жеткізудің ең тиімді тәсілдерінің бірі – контейнерлік тасымалдау. Модераторлардың айтуынша, осыған байланысты соңғы жылдары транзиттік контейнерлік жүктер ағыны үшін талас күшейтіліп, транзиттік дәліздердің тартымдылығын арттыру бойынша шаралар қабылдануда.
«Бұл мәселеде Қытай мен Азия-Тынық мұхиты аймағының елдері негізгі жүк үдеткіші болып табылады. Әлемдік үрдістерді ескере отырып, министрлік пен теміржол саласының алдына қойылған басым міндеттердің бірі – елдің транзиттік әлеуетін дамыту. Біздің еліміздің географиялық орналасуы Еуропалық Одақ елдері мен Азия-Тынық мұхиты өңірі арасындағы жүк ағындарына бірегей транзиттік мүмкіндіктер береді. Қазақстанның транзиттік хабқа айналуы бірқатар жобаларды іске асырумен қатар жүрді, соның ішінде Орталық өңірлерді Батыспен (Жезқазған-Бейнеу) байланыстыру, Алматы-Шу учаскесінің өткізу қабілетін арттыру (Алматы-Шу екінші жолдары), қажетті порт және терминал инфрақұрылымын құру (Ақтау, Құрық порттары, «Қорғас» құрғақ порты, КЛО және Боржақты-Ерсай) жобалары бар», – дейді Жәнібек Тайжанов.
Оның мәліметінше, І жартыжылдықтың қорытындысы бойынша барлық қатынастарды ескере отырып, контейнерлік жүктерді темір жол көлігімен тасымалдау көлемі 800 мыңнан астам ЖФЭ құрады. Өсім – 36%. Оның ішінде транзиттік контейнерлік тасымалдар 44%-ға ұлғайған. Жыл соңына дейінгі жоспар – 1 млн ЖФЭ. 2025 жылға дейін бұл көрсеткішті 1,6 млн ЖФЭ дейін жеткізу көзделген. Қазіргі уақытта тасымалдау көлемін одан әрі арттыру мақсатында өткізу қабілетін жаңғыртуды және ұлғайтуды талап ететін «тар» орындар анықталуда екен. Мәселен, Қытай-Еуропа-Қытай бағыты бойынша негізгі транзиттік дәлізде екінші жолдарды салу және Достық-Мойынты т/ж учаскесін электрлендіру жоспарлануда. Бұл жоба дәліздің өткізу қабілетін 5 есе арттырып, Қытайдан Еуропаға жыл сайын өсіп келе жатқан контейнер ағынын қамтамасыз етпек. Сондай-ақ, қазіргі Сарыағаш өткізу пунктін дамыту үшін Қазақстан мен Өзбекстан арасында Дарбаза-Мақтаарал жаңа теміржол желісін салу жоспарланған. Осы жобаны іске асыру учаскенің өткізу қабілетін 2 есе арттыруға, жүктерді тасымалдау мерзімін 1,5 есе қысқартуға мүмкіндік береді. Бұл жоба Орталық Азияның Еуропаға экспорттық-импорттық ағымын қабылдауға мүмкіндік беріп, Қазақстанның халықаралық нарықтардағы ұстанымын нығайтпақ.