Станцияларда жарықдиодты шамдар кеңінен қолданыла бастады
Атырау облысы бойынша меншікті тілші
Темір жолда қауіпсіздікті қамтамасыз ету мақсатында құрылғыларды жаңартып отырудың маңызы зор. Электрмен жабдықтау саласы бойынша соңғы жылдары өндіріске жаппай пайдаланыла бастаған жарықдиодты шамдар қауіпсіздігімен қоса тиімді әрі қуат үнемдеуде ұтымдылығымен ерекшеленеді.
Атырау магистральдық желі бөлімшесінің СОБ және электрмен қамту бөлімінің бастығы Амангелді Бержановтың айтуынша, 2022 жылдың 8 айы ішінде Атырау және Ақжайық белгі беру және байланыс дистанцияларында өндірісті автоматтандыру, озық технологияларды өндіріске енгізу қарқынды жүріп жатыр. Атап айтқанда, Мақат-Сағыз телімінің Жамансор, Кенбай, 377-бекеттерінде, Атырау-Қиғаш телімінің Афанасьев, Аққыстау, Исатай, Д. Нұрпейсова, Қызылжар, Бақсай бекеттерінде бағдаршамдардың көрінуін жақсартып және пойыздар қауіпсіздігін қамтамасыз ету мақсатында ескі ЖС-12/12, ЖС-12/25 шамдарын жарықдиодты ССС шамдарына ауыстыру жұмыстары жүргізілген.
– Бұл өз кезегінде өндіріске оң әсерін байқатып, қауіпсіздіктің сенімділігін арттыра түсті. Станцияларда қозғалыс және еңбек қауіпсіздігінің сақталуына пайдасы зор болып отыр. Сондықтан, осы бағыттағы жұмыстарды жалғастыра түсу мақсатында Атырау электрмен жабдықтау дистанциясында Мақат, Доссор, Қарабатан станцияларының перрондарына 60 дана жарықдиодты шам сатып алынды, – дейді Амангелді Бержанов.
Сонымен қатар, бүгінгі таңда Атырау белгі беру және байланыс дистанциясында 2022 жылдың 3-ші тоқсанына жоспарланған Атырау-Қиғаш телімінде Аққыстау, Исатай, Афанасьево бекеттеріне пойыз қозғалысы кезінде жылжымалы құрамның техникалық жағдайын автоматты түрде бақылауға арналған 6 дана жаңартылған контейнерлік техникалық жабдықтар кешенінің жүріс модульдерін орнату бойынша жұмыстар жүргізіліп жатыр.