«E-Telegram» жүйесі алғашқы нәтижесін беруде
Тараз қаласы бойынша меншікті тілші
Ұлттық компанияның ақпараттық технологияны дамыту бойынша стратегиялық жобалары теміржол мекемелерін цифрландыруға негіз болып отыр.
Бүгінгі күні пилоттық жоба аясында өндіріске енгізілген «E-Telegram» жүйесі алғашқы нәтижесін беруде. Бұл – қағазбастылықтан айырылудың тың жолы. Жаңа жүйе өндірістік және бизнес «telegram» болып екіге бөлінеді.
«ҚТЖ» ҰК» АҚ «Автоматтандыру және цифрландыру дирекциясы» IT Бизнес әріптесі Жамбыл филиалының директоры Асылхан Тайлақбаевтың айтуынша, ІТ технологияны игеруде жамбылдық теміржолшылар да белсенділік танытып отыр.
– Бүгінгі күні 1735 теміржолшы «E-Telegram» жүйесіне тіркелді. Оның 774-і Жамбыл бөлімшесі, 961-і Жамбыл магистральдық желі бөлімшесінің қызметкерлері. Сондай-ақ осы пилоттық жоба енгізілгелі 3084 электронды хабарлама жолданды. Әсіресе станциялардағы жүк қабылдап-жөнелтушілерге тиімді. Уақыт үнемдеуде де оңтайлы. Қазір осы жүйеге Жаңатас және Шайқорық станциялары қосылды. Бұл – бизнес «telegram» жүйесі. Өйткені өңірдегі екі ірі кәсіпорын – «Қазфосфат» және «ЕвроХим» компанияларының өнімдерін тиеп-жіберуде осы екі станцияның әлеуеті басым. Ал өндірістік «telegram» жүйесі Жамбыл және Шу локомотив пайдалану деполарының машинистеріне тиімді болып тұр. Болат жолдың бойына мал шығуы немесе басқа да келеңсіз жағдайларда жедел электронды түрде хабар алмасады. Енді құжат айналымын осы жүйеге енгізу жолы қарастырылуда, – дейді Асылхан Тайлақбаев.