Қытай Аягөз-Бақты теміржолын салуға ниетті
Абай облысы бойынша меншікті тілші
Аягөз-Бақты теміржолын салу жобасы тағы бір маңызды кезеңге көтерілді. Жоба Қытайдың Үрімжі қаласында онлайн және офлайн форматта ұйымдастырылған «Қытай-Еуразия» VII ЭКСПО көрмесінде қозғалды, деп хабарлайды Rail-news.kz.
Жалпы, Қытай тарапы осыған дейін де Аягөз-Тачэн теміржолын салу бойынша мүдделілік танытып келген болатын. Бұл ретте ҚХР-мен шектесетін жаңадан құрылған Абай облысы да өңіраралық қатынастарды нығайтуға мән беруде. Осы орайда көрме барысында екі аймақтың басшылығы өзара тиімді ынтымақтастық жүргізу бойынша арнайы хаттамаға қол қойды. Оның ішінде негізгі үш басымдыққа мән берілген. Соның екіншісі – екі аймақтың арасындағы ыңғайлы географиялық орналасуға байланысты транзиттік әлеуетті дамыту мәселесі болып отыр. Яғни, көлік-логистикалық ынтымақтастық саласында алдағы уақыттарда қолға алынуы тиіс Аягөз-Бақты-Тачэн бағыты бойынша темір жол құрылысы жобасын бірлесіп жүзеге асыру күн тәртібіне қойылды. Соның қатарында «Бақты» шекара бекетінде әкімшілік рәсімдерді оңайлату үшін тексеруден өтудің жеделдетілген режимі және шекарадан өту алгоритмдері де қарастырылды.
Аталған теміржол телімін салуға қытай тарапы толықтай әзір отыр. Осыған дейін қытайлық компаниялар Аягөз бен Бақты аралығында құрылыс жүргізуге де ниетті екендіктерін білдіргенді.
Осылайша ҚХР-дың Шыңжаң-Ұйғыр автономиялық ауданы мен Қазақстанның Абай облысы арасында берік байланыстар орнату, көлік-транзиттік және сауда-экономикалық қатынастарды нығайту жұмыстары жаңа белеске көтерілді деуге негіз бар.