Биыл 943 км жол жөндеуден өтті
«Қазақстан теміржолшысы» газетінің тілшісі
Қазіргі таңда магистральдық желінің жағдайы пойыздардың белгіленген қозғалыс жылдамдығымен бірге олардың қауіпсіз жүріп тұруын қамтамасыз етіп отыр.
Жол және жасанды құрылыс департаменті мамандарының айтуынша, жазғы жол жұмыстарының жыл сайынғы көлемі өндірістік қуаттылыққа, басымдыққа ие учаскелердің жағдайына және Компанияның қаржылық мүмкіндіктеріне байланысты айқындалады екен. Алдағы 2023 жылы 567 км жол күрделі жөндеу көрмек.
– Үстіміздегі жылы жазғы жол жұмыстары шеңберінде 943 км жол жөндеу түрлерінен өтті. Соның ішінде 551 шақырым жолға күрделі жөндеу жүргізілді. «ҚТЖ» ҰК» АҚ филиалы ПЧМ Ағадыр мекемесі 51 шақырым жолды шаруашылық тәсілмен жөндеді. Сонымен қатар 75 шақырымда ескі шпалдар жаппай су жаңа темірбетонды негізге көшіріліп, бекітпелері ауыстырылды. 164 шақырымда жаңа түйіспесіз жолдар төселді. Сондай-ақ, 90 км жолға күшейтілген орта жөндеу жүргізіліп, нәтижесінде жол жаңа келбетке ие болды, – дейді Жол және құрылыстар департаменті директорының күрделі құрылыс жөніндегі орынбасары Нұрсұлтан Танабаев.
Жолды күрделі жөндеуден өткізу нәтижесінде 911,7 шақырымда жолаушылар, ал 308,8 шақырымда жүк пойыздарының, 904,1 км жол бойында контейнерлік пойыздардың қозғалыс жылдамдығы артқан. Ал бұл өз кезегінде теміржол учаскелерінің өткізу қабілетін ұлғайтуға мүмкіндік беріп отыр.