Атырауда биыл жүз шақырым жол жаңарады
Атырау облысы бойынша меншікті тілші
Қозғалыс қауіпсіздігін сақтап, станциялардың өткізу қабілетін, пойыздар жүрісінің жылдамдығын арттыру үшін ең алдымен жол сапасы жақсы болуы шарт. Ал өңірде әлі де болса жаңартатын жолдар аз емес.
Атырау магистральдық желі бөлімшесі бастығының міндетін атқарушы Амангелді Рахмеденов биылғы жылға арналған жоспар бойынша өңірде 99,97 шақырым жол күрделі жөндеуден өтетінін жеткізді.
– Қазіргі уақытта Атырау жол дистанциясы бойынша Исатай станциясы мен 11 разъезд аралығында 29,5 шақырым жол салынып жатыр. Бүгінгі күні оның 13,337 шақырымы бітті десек болады. Сондай-ақ рзд14, рзд-15 – Аққыстау станциясы арлығында 19,7 шақырым жаңа жол салынады,– деді ол.
Рахмеденовтың мәліметінше, күрделі жөндеу жұмыстары барысында жолдың ескі темір жолы түгел алынып, орнына су жаңа темір-бетонды шпалдар барлық технологиялық талаптар сақталып, салынып жатыр. Бұрынғы рельстердің ұзындығы 25 метрлік болып бунақталып салынатын болса, қазіргі уақытта түйіспесіз рельстер төселуде. Бұл дегеніміз болтқа, қапсырмаға деген шығынды азайтып қана қоймай, пойыздар жүрісінің жайлылығын арттырады. Нәтижесінде жолаушылар пойызының жылдамдығы 60км/сағаттан 120км/сағатқа, жүк тасымалы пойызының жылдамдығы 50км/сағаттан 100км/сағатқа көтеруге ықпал етеді. Қазіргі уақытта Ресейден келіп-кетіп жатқан пойыздар осы жолдармен жүйткіп өтіп жатыр.
Сонымен қатар, Құлсары жол дистанциясы бойынша Қоркөл – Рзд-464 аралығында биыл 31,05 шақырым жол салу жоспарланып, бүгінде 10,740 шақырым жол күрделі жөндеуден өткен.
– Аталған участокте бұрынғы ағаш шпалдар түгел алынды. Жердің негіздемесі төселіп, шебін төсеу, жерді нығыздау, басқа да технологиялық талаптарға сай жұмыстар жасалуда, – дейді Құлсары жол дистанциясының бастығы Рақымжан Көрпебаев.
Күрделі жөндеуден өткен жолдарда енді жолаушы пойыздарына сағатына 120 км, Тальгоға 140 км, ал жүк пойыздарына 100 км дейін жылдамдыққа рұқсат етіледі. Күрделі жөндеу жұмыстары барысында мердігер «ПМС Интеграконтракшн» компаниясы күндіз тәулігіне 6 сағаттық толаскез алып, жұмысты жоспарлы уақытта бітіруге уәде беріп отыр.
Ағымдағы жылы бөлімше бойынша күшейтілген орташа жөндеу мен бағыттамалы бұрмаларды ауыстыру жұмыстары да жүргізілуде. Атырау жол дистанциясы бойынша Мақат, Сағыз, Мұқыр, Кенбай, Жамансор станциялары аралығында барлығы 20,7381 шақырым жолды орташа жөндеу белгіленген. Қазіргі уақытта 4,826 шақырым жол жөнделіп біткен. Сондай-ақ, 30 жиынтық бағыттамалы бұрма салу жоспарланып, Сағыз – рзд-14 аралығында 2, Құлсары – Рзд-468 аралығында 4 жиынтық бұрма жаңадан орнатылған.