Темір жол бойындағы ауылға электр желісі тартылды

Атырау – Астрахань темір жолы пайдалануға берілген өткен ғасырдың 70-жылдары жол бойында пайда болған Томан ауылы соңғы кезде электр энергиясынан тапшылық көріп отырған.

Негізінен теміржолшылар тұратын Аққыстау ауылдық округіне қарасты №17 теміржол бекетінде орын тепкен Томан ауылында электр желілері үзіліп, жарықтың сөнуі жиілеп кеткелі талай жыл. Трансформатор ескіргендіктен, жел соқса немесе ауа райы бұзылса, жарық жиі сөніп қала береді. Теміржол тартылған тұста 1970 жылы жүргізілген электр желілері әбден тозығы жетіп, ескірген және сол кезден бері жаңартылмаған. Бекет арқылы тәулігіне 10 жүк және екі жолаушылар пойызы өтеді. Солардың бәрін қабылдау, өткізу байланыс құралдарының сапасына байланысты. Ал ол үшін электр желісінің ақаусыз болғаны маңызды.  

Биыл бұл мәселе оң шешімін тапты. Х.Ерғалиев ауылының подстанциясынан Томан ауылына дейін 30 шақырымды құрайтын 10 киловаттық электр желісін тарту жұмысы басталып, осыған орай жобаға түзету жұмыстары енгізілген. Томан ауылішілік электр желілерін жаңарту және көше жарықтарын жүргізу мақсатында сметалық құжаттамалары жасақталып, биылғы мамыр айында құрылыс жұмыстары қолға алынып, жұмыс қарқынды жүрді. Бүгінде ауыл көшелеріндегі электр бағаналары жаңартылып, қайта орнатылып, томандықтардың жарықсыз отыратын күндері артта қалды. Елді мекенге тартылған электр желісі 430 тұрғыны, 80 түтіні бар ауыл үшін көптен күткен қуаныш болды. Бұған қоса, ауылдағы әлеуметтік нысандар күрделі жөндеуден өтіп, пайдалануға берілді. Бірнеше жыл бұрын табиғи газ беріліп, көшелері асфальтталған теміржолшылар ауылы жаңа келбетке ие болуда.