Жылыту орыны жолшылардың көңілінен шықты

Бүгінде Қазақстан темір жолының жол бойында, жел өтінде еңбек ететін теміржолшылар қыста жылынып, жазда демалып дегендей ас ішіп, аяқ суытатын шағын үйшіктер пайда болуда.

Бұл әсіресе жыл он екі ай ашық далада, перегонда жұмыс істейтін жолшылар үшін өте бір игілікті іс болып отыр. Ақтөбе жол дистанциясы аумағында да бірнеше жылыту пункті пайдалануға беріліп, аязды, боранды күндері жұмысқа шығып, қар тазартатын жолшылар дән риза болып отыр.  

– «ҚТЖ» ҰК» АҚ  Ақтөбе магистральдық желі бөлімшесі басшылығының ұйымдастыруымен Ақтөбе жол дистанциясы мұндай жылыту пунктерінің 15-ін орнатып үлгерді. Теміржолшылардың әлеуметтік жағдайын жақсартуға бағытталған мұндай шаралар соңғы кезде аз емес, әсіресе жылыту пункттері  теміржолшылар үшін тиімді болып отыр. Бұрын біздің жұмысшылар бұрмаларды қардан тазалаған кезде станциядан қатынайтын еді. Бұл әсіресе қыс кезінде қиындық туғызатын. Енді жылыту пункттері қармен күрес жұмыстарын ұйымдастыру үшін тиімділікті арттыратынына сенім мол, – деді Ақтөбе жол дистанциясының бастығы Кеңес Нұртаев.  

Жылыту пунктінің біреуі төрт адамға арналған. Түнгі не күндізгі кезекшілікке шыққан теміржолшылар оны кәдімгі үй секілді емін-еркін пайдалана алады. Пункт ішінде жылыту пеші қойылған, электр желісі жүргізілген. Төсек-орын, ас ішіуге арналған жабдықтар, үстел-орындық, басқа да керек-жарақпен жабдықталған кішкентай болса да ұядай жинақы да жылы бөлменің еш кемдігі жоқ.    

Күні кеше Магистральдық желі бөлімшесі басшылығымен осындай пункттердің бірнешеуін аралап шығып, оған толық көз жеткіздік. Айналасы абаттандырылып, тазалық жұмыстарына да мән берілгені байқалады.  

– Ақтөбе дистанциясында жеті жылдан бері жол жөндеуші болып жұмыс істеймін. Жіңішке станциясы аумағында жұмыс істейміз. Ұлттық компания әлеуметтік тұрмысты жақсарту мақсатында жылыту пункттерін пайдалануға беріп жатыр. Бұл қысқы уақыттағы кезекшілік кезінде өте ыңғайлы болады. Жылы және жарық. Енді қыстыгүні алыстан ат арылтып жүрмей осы жерден шығып, бұрмаларды тазалаймыз. Тек қыста емес, жазда да ас ішіп, аяқ суытатын пана, – деді Ақтөбе жол дистанциясының жол жөндеушісі Өмірсерік Зәкиев.