Қызылорда жолшылары бағыттамалы бұрманы ауыстырады

Жалағаш станциясының солтүстік алқымында жұмыс істеп жатқан  Қызылорда жол дистанциясының жолшылары бағыттамалық бұрманы ауыстырудың дайындығын жасауда.

Жалағаштық телім бригадирі Марат Пазылбековтің басшылығымен жүріп жатқан жұмысты екі топқа бөлінген жолшылар жүргізуде. Бірі ағымдық күтіммен айналысуда, екіншісі станциялық жолдағы ауыстырылатын бағыттамалық бұрма рельстерін темірбетон шпалға бекітіп дайындау жұмыстарымен айналысуда.    

– Жұмысқа қажетті құрал-сайман жеткілікті. Бағыттамалық бұрма жаңадан жинайтын болғандықтан барлық өлшемдердің сақталуына басымдық беріп, «екі өлшеп, бір кесіп» жатырмыз. Бұрма басының рельске жалғанатын жеріндегі өлшем бойынша рельске бекітілетін шпал арасы 420 милиметрден болатын болса, соңына қарай екі шпал арасы 538 милиметрлік қашықтықпен бекітілетін болады. Осы және өзге де өлшемдерден ауытқымау үшін рельс бойына бекітілетін нүктелердің орнын алдын ала өлшеп алып, қайта тексеріп жұмыс жасаймыз.  Барлық жұмыс өлшеммен жасалады. Бекітпелер бекітілетін орындарды алдын ала өлшеп, сызып белгілеп алып, бекітеміз. Жігіттердің бәрі 20-25 жыл жұмыс жасаған тәжірибелі теміржолшылар болғандықтан сенімді, – дейді бригадир Марат Пазылбеков.

Станция жолындағы №7 ағаш шпалды бағыттамалық бұрманың ауыстырылуы – жоспарлы жұмыс. Міне, жол жөндеушілер Қайрат Досаев пен Рақым Аманов рельске бекітілетін шпалдардың арақашықтығына қарай төмен түсіңкіреп тұрған шпалды астынан сүйменмен демеп бекітіп жатыр. Шпал араларының өлшемі бағыттамалық бұрманың басында 420 милиметрден басталып бекітіліп, қашықтаған сайын 538 милиметрлік арақашықтықпен бекітіліп, осы өлшемдер қадамының сақталуы маңызды саналады екен. Жалпы бұрманың басында рельстің қосылатын жерлерінде 420 мм түйіспе нүктесінен алыстаған сайын 538 мм дейінгі қашықтықпен бекітіледі.  

Рельстерді қажетті өлшемде кесіп алатын «Жейсмар» кескішімен Жеңіс Жаналиев пен дистанцияның Тереңөзек телімінен көмекке келген Мақсат Сексенбаев жұмыс істеп жатыр. Яғни рельстерді дәл өлшеммен кесіп даярлап жатыр. Ал болттарды қатайтатын бекіткіш «Жейсмар» құрылғыларымен Бауыржан Қалыбеков, Бекзат Ибрагим мен Бағдат Пірманов айналысып, пружиналы ЖБР бекітпесін бұрап жүр.