Кадрдың қадірін білген жан

Атырау магистральдық желі бөлімшесінде кадрлар бөлімін басқаратын Анар Жалғасбаева жиырма жылға жуық осы қызметті абыроймен атқарып келеді. «Теміржолшы – қауіпті де жауапты ерекше кәсіп иесі. Сол себепті әр еңбек адамы мен үшін қымбат», – дейді ол.

Персоналды басқару, яғни кадр бөлімінің басшысы – қандай да бір кәсіпорындағы негізгі мамандық. Қызметкерді жұмыс орнына қабылдау, ауыстыру, жұмыстан босату, біліктілігін арттыру, демалыстарын ресімдеу, ынталандыру, т.б. функционалды міндетін атқарумен қатар, Анар сияқты жүрегі жұмсақ, жаны таза кадр қызметкерлері әр адаммен тонның ішкі бауындай жақын қарым-қатынас орната білсе, нұр үстіне нұр. Әрине темір жол, соның ішінде магистральдық желі – көп тармақты мекеме, құрылымдық бөлімдері де аз емес. Оның әрқайсысында жүздеген адам еңбек етеді. Сондықтан әр жұмысшыны бағалау, олардың ұсыныс-талаптарын қанағаттандыру, әркімнің қадір-қасиетіне жете білу оңай жұмыс емес. Дегенмен, Анар алдына келген адаммен жан-жақты танысып, әңгімеге тартып, жақын білуге тырысады. Сондықтан көпшілік персоналмен жақсы таныс, жағдайларын да жақсы біледі. Сонымен қатар Анар құрылымдық кадр бөлімі басшыларымен тығыз қарым-қатынас орнатып, кадр мәселесіне қатысты орын алып жатқан жаңалықтар мен өзгерістерден хабардар болып, реті келсе ақылдасып, талқыға салып отыруды да ұмытпайды.  

Анар Амантайқызы Атырау мұнай-газ институтын «Экономика және менеджмент» мамандығы бойынша бітіріп, темір жолдағы еңбек жолын есепші болып бастаған. Кейін жетекші инженер, персоналды басқару бөлімінің менеджері, одан басшысы болып күні бүгінге дейін қызмет атқарып келеді. «Үздік маман», «Адал еңбегі үшін» төсбелгісінің, «Үздік басшы» дипломының иегері. Биылғы жылы «Теміржол – менің тағдырым» байқауына қатысып, бақ сынады.  

Ал үйде төрт баланың анасы үшін жұмыс жетеді. Отбасының түтіні түзу шығып, өсіп келе жатқан ұл-қыздары жақсы азамат болып өссін дейтін барша қазақ әйелінің тілегі – Анардың да тілегі.