Қазақстан темір жолына 120 жыл: велосаяхатшы сапарға шықты
Теміржолшыларға жақсы таныс сала ардагері Жұмабай Отарғалиев велосипедімен кезекті саяхатқа шығып, Қазақстан темір жолының бастауы Орынбор-Ташкент темір жолының бойымен жүріп өтті.
Жұмабай ақсақал Ақтөбе вокзалынан шығып, Хромтау, Әйтеке би, Бершүгір станцияларынан өтіп, Шалқар арқылы Қызылордаға бет алды. Әрі қарай Түркістан, Сарыағаш станцияларының бойымен жүріп өтіп, Өзбекстан аумағына өтті. Әр станцияда теміржолшы ардагерлермен кездесулер ұйымдастырып, естелік суреттерге түсті. Велошабандоз Орынбор-Ташкент темір жолының 120 жылдығына орай Ташкентке дейін велосипедпен баруды мақсат тұтқан. Сапарын Қазақстан теміржолының 120 жылдығы, Хромтау-Алтынсарин темір жолының 20 жылдығы, Әйтеке бидің 380 жылдығы, Ақтөбе қаласының 155 жылдық мерейтойларына арнады.
Шілде айының онында жолға шыққан саяхатшы Сыр өңіріне 17 шілдеде жетіп, аял жасады. Бұған дейін Қазалы станциясының теміржолшылары ақсақалды қарсы алып, керек-жарағын түгендеп шығарып салған екен. Бір апта бойы жолда жүрген саяхатшы-жиһангез қызылордалықтардың да назарынан тыс қалмады. Кәсіподақ ұйымы тарапынан қолдау жасалып, ұйым белсенділері зейнеткердің сапарын әрі қарай жалғастыруына жағдай жасап, аттандырып салған еді.
Келесі аптада Ташкент шаһарына жетуді межелеген зейнеткер-велошабандоз кеше Қызылорададан шығып, Түркістан, Сарыағаш қалаларын бетке алды. 70 жастағы Жұмабай Отарғалиев 2017 жылдан бастап темір жол бойымен велосипед арқылы түрлі сапарлар ұйымдастырып жүр.
Ардақ Ерубаева, Ақтөбе
Сабырхан СЕЙІЛБЕКҰЛЫ, Қызылорда