Аягөздік ардагерге құрмет көрсетілді

Қоғамдық жұмыстарға белсене атсалысып, ел игілігі жолында, әсіресе теміржол саласының өркендей беруіне елеулі үлес қосып жүрген аға буын өкілдері ел шығысында да жетерлік. Солардың бірегейі аягөздік ардагер Сейітбек Ешмуратов.  

Зейнет жасына аяқ басса да аттан түспей келе жатқан теміржол саласының тарланы жуырда ерекше марапатқа бөленді. Теміржол саласында 40 жылдан аса еңбек жолы бар Сейітбек Назарұлына Аягөз өңіріндегі тәртіп пен қоғамдық қауіпсіздікті қамтамасыз ету жолында полиция қызметкерлерімен бірлесе жүргізген нәтижелі еңбегі үшін ҚР  Ішкі істер министрі, полиция генерал-лейтенанты Е.Саденовтің «Алғыс хаты» салтанатты түрде табыс етілді. Астана төрінен жеткен осынау марапатты ел ағасына Аягөз ауданының ІІБ бастығы К.Абишев салтанатты түрде табыстап, ардагердің өнегелі еңбек жолының кейінгі буын жастар үшін үлгі екенін атап өтті.  

Теміржолшылар Сейітбек Назарұлын Ақтоғай локомотив пайдалану депосының ашылуына ерен үлес қосқан қайраткер ретінде жақсы біледі. Ал бүгінде жеке кәсіпкер ретінде қоғамдық жұмыстарға белсене араласуда. Сонымен қатар Аягөз өңіріне танымал меценат. Ақтоғай, Таңсық станцияларымен оған жақын елді мекендер игілігі үшін қосып келе жатқан үлесі аз емес. Сондықтан болар өткен жылы ғана Абай облысы мәслихатының Алғыс хатын алып, «Аягөз ауданының құрметті азаматы» төсбелгісін өңіріне тақты. Ал зайыбы Сәуле Қалиасқарқызы «Офицердің Анасы» төсбелгісімен марапатталды. Бұл – Алматы қаласында полиция қызметінде жүрген қыздары Елдананың еңбегі мен тәрбиесіне берілген баға болса керек.