Темір жолдың темірдей тәртібінде шыңдалған ер

Темір жолда еңбегімен де, ерлігімен де танылған азаматтар аз емес. Солардың қатарында «Әскерилендірілген теміржол күзеті» ЖШС Атырау филиалының күзетшісі Әділбек Арыстанғалиев бар.

...Қараша айының суық күндерінің бірі еді. Әділбек әдеттегідей жұмыс бабымен теміржол нысанын бетке алып, Жайық өзені үстінен салынған көпірге жылжып келе жатқан жүк пойызының қозғалысын қадағалап тұрған. Сол сәт бекет кезекшісінен келген хабар күзет сарбаздарына бірден тарады. Жас қыздың өзіне қол жұмсамақ ниетпен Жайық өзеніне секіргені туралы хабарды ести сала жүгірген Әділбек көп ұзамай суға бір батып, бір шығып бара жатқан қызды көрді. Еш ойланбастан шұғыл әрекетке көшіп, қыздың артынан суға секірді. Қарашаның қара суығында су да денеңді қарып өтердей екен. Әп сәтте бойын жинап алып қызға жетті, киімінен ұстап жағаға қарай малти бастады. Осылай керек жерде, керек кезде, керек уақытта табылған Әділбек қызды құтқарып қана қоймай, алғашқы дәрігерлік көмек көрсетіп, ажалдан арашалап қалды. «Міне азамат, жарайсың!», «Бәрекелді, азамат екенсің!» десті оқиға орнына жиналып қалғандар теміржол күзеті сарбазының ерлікке пара-пар әрекетіне риза болып. Әділбекке Азамат деген екінші есім осылай телінген болатын. 

Тағы бір жағдайда темір жол бойына есірткі тасып таратушыларды ұстап, тәртіп сақшыларына тапсырды. Әрине, бұл екі түрлі жағдай болғанымен, оларға тән ортақ нәрсе, екеуінде де Әділбек өз басын қатерге тіккен еді. Бірақ оны ол ерлік деп санамайды. Азаматтық борышы, қызметтік міндеті деп біледі.

– Әскерилендірілген теміржол күзетінде жұмыс істеп жатқаныма төртінші жыл. Бұған дейін медицина саласының әскери бөлімінде жұмыс істедім. Теміржол күзетінің өзіне тән ерекшелігі бар. Тәртіп өте қатаң, жауапкершілік аса жоғары. Теміржол көпірі – стратегиялық нысан. Сондықтан оның қауіпсіздігін қамтамасыз ету аса маңызды. Біз осы көпірге мал-жанның шықпауын, жылжымалы құрамдардың кедергісіз өтіп тұруын, пойыздардың қозғалыс қауіпсіздігінің сақталуын қамтамасыз етеміз. Еңбегіміз компания тарапынан елеусіз қалмайды. Әсіресе әлеуметтік қамтамасыз ету жағы жақсы жолға қойылған. Ұжымдық шарттағы барлық шарттар орындалады. Біздің күзетшілер ұжымының ауызбіршілігі мықты, өте ұйымшыл. Оны былтырғы су тасқыны кезінде де көрген боларсыздар, – дейді Әділбек.