Түлкібастық инженердің жобасы миллиондаған қаражатты үнемдеді
"Қазақстан теміржолшысы" газетінің Жамбыл облысындағы меншікті тілшісі
Бүгінде жол шаруашылығына «МПЭШ-65» топсалы түріндегі металл полимерлі төсемді жаңғырту» тәсілін енгізудің тиімділігі айқындала түсуде. Мамандардың айтуынша, төсемнің мұндай түрі механикалық беріктікті қамтамасыз етіп, рельске оңтайлы бейімделетіні тәжірибе жүзінде дәлелденген.
Барлық өңірдегі темір жол саласының жаңашыл, идеяшыл мамандарының басын қосқан «Рационализаторлық – техникалық дамудың негізі» атты конференцияда осы рационализаторлық ұсыныстың авторы – Жамбыл магистральдық желі бөлімшесі Түлкібас жол дистанциясының бас инженері Шәмшидин Дадабаев үздіктер қатарынан көрініп, 3-орын иегеріне арналған 259 500 теңгенің қаржылай сертификатына ие болды.
Сала мамандарының сөзіне сүйенсек, бұл рационализаторлық ұсыныс тозған тығыздағыштарды қайта пайдалану және кесу дискісін, тегістеу қағазын және эпоксидті тез кептіретін материалды пайдалану арқылы оны жаңартып, қызмет ету мерзімін ұзарту арқылы металл полимерлі төсемдердің қажеттілігін үнемдеуге мүмкіндік береді екен. 4400093939 жүкқұжатына сәйкес, 1 металл-полимерлі төсемнің құны 70456,88 теңге. Сатып алу үшін қажетті шығындар 70Х70456,88 = 4931981,6 теңгені құрайды: ұсыныстан кейінгі шығындар көлемі – 3006,96 теңгеге жеткен. Тиісінше экономикалық тиімділік: 4931981,6 - 3006,96 =4 928 974,64 теңгені көрсетіп отыр.
– 2025 жылы мамыр айында желініп, істен шыққан топсалы төсемді алып, жөндеуден өткізіп, МПЭШ - 65 төсемдерін ауыстырып салдым. Бір жылдың ішінде желінбеді, еш сыр бермеді. Бір ғана нүктедегі төсемді жаңғырту арқылы қаншама үнем жасалды. Дистанция бойынша экономикалық тиімділігі 4928974,64 теңгені құрады. Былтыр Абайыл және 4 станциядағы жылыту пункттерінде, 2024 жылы жаяу жүргіншілер төсемдеріне жөндеу жүргіздік, – дейді бас инженер.
«Үздік рационализатор» төсбелгісімен 2022 жылы марапатталған өнертапқыш бас инженердің осы рационализаторлық ұсынысы конкурс қорытындысы бойынша үздік деп танылып, ІІІ дәрежелі дипломмен марапатталып, қаржылай сертификатқа ие болып отыр.
Темір жол саласында 39 жылдан бері үздіксіз еңбек етіп келе жатқан білікті маман еңбек қауіпсіздігі мен еңбекті қорғау ісіне аса жауапты, сала ісін дамытуда ізденісі көп сарапшы. Оның бүгінге дейін жұмысшылардың еңбек жағдайын жақсартуға бағытталған он шақты жобасы тиісті бағасын алған.
Әріптестері Шамшидин Дадабаевты кәсіби маман деп бағалайды. ПЧ, ЭЧ, ШЧ дистанциялары басшыларының шақыруымен практикалық дәрістер өткізіп тұрады. Оған қоса, жыл сайын пойыздардың қозғалысын қамтамасыз ету және малдың шойын жолға шығып кетуін болдырмау үшін магистральдық желі бойына қоршау салу кестесінің жоспарын әзірлейтін көрінеді.
Шамшидин Нәжімұлы еңбекті қорғау және қауіпсіздік техникасы бойынша жетекші инженер болып жұмыс істеген 15 жыл ішінде дистанцияда жұмысшылардың жарақат алу жағдайларының тіркелмеуі – оның өз ісіне қаншалықты жауапкершілікпен қарайтынын көрсетсе керек. Осы нәтиже үшін ҚТЖ басшылығы оны «Еңбекті қорғау саласындағы сенім» сертификатымен марапаттаған.
