Мұнайлы астананың жүк қақпасы

Атырауға келетін жалпы жүктің 60 пайызы Ақжайық станциясына тиесілі екенін назарға алсақ, оны мұнайлы астананың жүк қақпасы деуге әбден болады. Оның үстіне басқа станциялар сияқты тек мұнаймен айналыспайды, цистерналарға бензин, мазут, реактивті отын да құйылады. Егін егу мен орақ кезінде еліміздегі ауыл шаруашылығы мекемелеріне тапсырыс бойынша дизель отыны жіберіледі. Ал қазір көктемгі егістің қызған шағы… 

Елдегі қалыптасып отырған төтенше жағдайға қарамастан Ақжайық станциясы жүк тасымалын ойдағыдай орындап, бар мүмкіндігімен жұмыс істеуде. Станцияның 7 қабылдап-жөнелту, 3 тұрақтау жолы бар. Маневр жұмыстары станция ішінде жасалып, ол екі маневрлік теполовозбен атқарылауда. Станциядан күніне 2-3 пойыз, 100-150 вагон қабылдап-жөнелтіледі, жолдары қысқа, дөңесі жоқ станция үшін бұл аз жүктеме емес, әсіресе жүк тиеу мен түсіру көлемі артып кеткен кезде қиындық туғызады.

Станция бастығы Есенжан Темірғалиевтің айтуынша, өткен 3 айда станцияның жетістігі жаман болмады, жоспар межесінен көріне білді. Мәселен, үш айда орташа тәуліктік жүк тиеу көлемі жоспарда 3 вагон болса, нақты 6,3 вагон тиеліп, барлығы 210 пайызды құраған. Тоннамен есептегенде станция арқылы 198 тонна орнына 375,3 тонна жүк тиеліп, жоспар 189,5 пайызды құрапты. Ал, жүк түсіру тәулігіне 57 вагон болып, 120,0 пайызға жетті.

Бір жүк операциясына тұру 35,78 сағатты құрап ол жоспарға шаққанда 103,9 пайыз болды. Статистикалық салмақ 153,2 пайызға орындалды. Жергілікті вагонның тұруы да 113,7 пайызды құрап,ол да жоғары көрсеткішті көрсетті. Орташа тәуліктік вагон айналымы 51,7 вагонды құрады. 5181 вагон түсіріліп, жоспар 197,9%-ды құрады. Төтенше жағдай кезіндегі жұмыстың ауырлығы мен күрделілігіне қарамастан станция ұжымы өздеріне берілген жоспар межесінен көрініп отыр.

– Станция қалыпты жұмыс жасауда, алайда, кейбір инженерлік құрам мамандары, мысалы, аға тауар кассирі, аға жүк қабылдап-жөнелтуші, еңбек қорғау инженері сияқты мамандар онлайн режимде жұмыс жасауға көшті. Станция басшылығы, станция бойынша кезек шілер, вагон қараушы, басқа да мамандар ауысыммен жұмыс жасауда. Бірақ қалада карантин жариялануына байланысты, түнгі ауысым кешкі жетіде басталып, таңертең сегізде аяқталады. Себебі қалада қоғамдық көліктердің жүру мерзімі таңғы 7-ден кешкі жетіге дейін шектелді, – дейді станция бастығы.

Атырауда 30 наурыздан 15 сәуірге дейін енгізілген карантин режимі 1 мамырға дейін ұзартылды. Бұл туралы төтенше жағдай режимін қамтамасыз ету жөніндегі шұғыл штаб хабарлады. Бұдан басқа, 16 сәуірден бастап қалада қозғалыс толық жабылады деп күтілуде, тағы қандай тыйымдар болатыны әзірге нақтылаған жоқ. 16 сәуірден бастап азаматтардың тіршілік әрекетін қамтамасыз ететін орындарды қоспағанда, барлық кәсіпорындар мен ұйымдар толықтай жабылатыны айтылуда.

«Тұрғындар барынша өздерін оқшаулары тиіс. Сонда ғана коронавирус инфекциясының таралуын тоқтатуға болады» дейді штаб өкілдері. Сондай-ақ, көп ұзамай жаңа шектеулер жария етілетіні де белгілі болып отыр.