Мыңбала станциясына қош келдіңіз

«Жезқазған-Бейнеу» темір жолының құрамдас бөлігі Сексеуіл-Қоскөл телімі бойында күні кешеге дейін Промежуточный аталып келген станция болды. Ол енді Аңырақай шайқасында мың баладан қол жинап, жоңғар басқыншылығына қарсы күрескен Сартай батыр бастаған жаужүрек өрендер құрметіне «Мыңбала» атауын иемденіп отыр.

Тұран топырағында қандастарынан қол жиып, жаудың мысын басқан Сартай батыр есімінің Мыңбала болып түрленіп тарихқа енуі – Тәуелсіз елдің жаңа тарихының бір беті. 

Қазақтың биі әрі батыры Сартай Байжанұлының қоғамдық-саяси қызметін тарихи тұрғыдан Қазақ тарихындағы алатын орнын зерделеп зерттеу тарихшылардың еншісінде. 

Біздер тек Мыңбала станциясының Қызылорда ЖТ бөлімшесіне тиесілі екенін мақтаныш етеміз. 

2014 жылдың тамызында пайдалануға берілген «Жезқазған-СексеуілБейнеу» темір жолының Сексеуілден Қоскөлге дейінгі 271,3 шақырымы Қызылорда ЖТ бөлімшесіне қарайды. 

Сол жылдары осы телім бойында Қарашеген, Абай және Промежуточный деп аталған 4 станция және 10 бекет салынып, қолданысқа берілді. Сол күннен бастап жаңа жолмен Қытай, Таяу Шығыс елдерінің және өз еліміздің орталық өңірлерінен тиелген жүк құрамалары Иран, Кавказ бен Еуропа елдеріне жол тартуда. 

– Телім бойындағы төрт станция мен он бекетте тұрғын үйлер, ЭЦ посттары, СОБ және байланыс объектілері, электр нысандары, станциялардағы вокзал ғимараттары, КТСМ пункттері, өртке қарсы резервуарлар, қар мен құмнан қорғау төсеніштері, жылу қазандықтары іске қосылып, жұмыс жасауда. Телім теміржолшылары вахталық ауысым тәсілімен жұмыс жүргізіп, жылжымалы құрамдардың қауіпсіз қозғалысын сақтап еңбек етуде. Осы телім бойындағы Промежуточный станциясының атын «Мыңбала» деп өзгерту көпшіліктің сұранысымен қолға алынды, – дейді Қызылорда ЖТ бөлімшесінің техникалық бөлім бастығы Жарқынбек Рсымбетов. 

Мыңбала станциясының аты берілу үшін жергілікті тұрғындардың өтінішіне байланысты құзырлы органдарға құжаттар жөнелтілген. 

Осындай ресми құжаттың бірі Қарағанды облысының ономастикалық комитетіне, Ұлытау аудандық мекемесіне жолданып іс-шаралар жасалған. Нәтижесінде компания басшылығының қолдауымен Промежуточный станциясына Мыңбала есімі берілді. 

Қазіргі таңда станцияларда вокзалдардан бөлек теміржолшыларға арналып салынған қос пәтерлі тұрғын үйлер мен салалық кәсіпорындар объектілері рет-ретімен бой түзеп, кешеге дейін құлан жортар маң далада ірге көтерген станцияларды көріктендіріп тұр. Жаңа телім бойына КТСМ пункттері, ТОБЖ (ВОЛС-талшықты оптикалық байланыс желісі) тартылып, тиісті нүктелерге ZTE (DWDM), Motorola (Тетра) құрылғылары, IP-ТС ақпар құралдары, СОБ МПЦ Ebilok-950 жүйелері орнатылған. Жаңа телімнің заманауи байланыс желілері жұмыс бабына келтіріліп, барлық учаске бойында жұмыс атқаруда. ВЛ АБ, ПЭ және АБ-ПЭ секілді түрлі кернеулі электр күшімен жабдықтау желілері мен пойыздардың қозғалысын реттеуге қажетті бірнеше нысан жылжымалы құрамдардың қауіпсіз қозғалысын сақтауды арттыруға қалтқысыз қызмет етуде. 

Жер көлемі жағынан Қарағанды облысына қарасты, бөлімше бойынша Қызылорда ЖТ бөлімшесіне тиесілі Промежуточный станциясының атын «Мыңбала» деп өзгерту биыл – Тәуелсіздіктің 29 жылдығы қарсаңында жүзеге асты.