Теміржол саласында орын алатын қайғылы жағдайлардың себептері мен салдары сараланды

Қызылорда магистральдық желі бөлімшесінде «Еңбек қауіпсіздігі және еңбек қорғау» тақырыбында өткен семинарға бөлімшеге қарасты Түркістан мен Сексеуіл станциялары арасындағы мекемелердің еңбек қорғау инженерлері мен техникалық инспекторлары қатысып, өзара тәжірибе алмасты.

Еңбек қорғау саласындағы қоғамдық қатынастарды реттеу, еңбек қауіпсіздігін қамтамасыз етуге үлес қосу арқылы теміржолшылардың өмірі мен денсаулығын сақтауға бағытталған мемлекеттік саясаттың негізгі ұстанымдарын насихаттауда белсенді әрекет ету – бүгінгі күннің талабы. Жаңа Қазақстандағы өзгерістерді осындай принциптерді ұстана отырып әр адам өзінен бастау қажет деген ұстаным жиынның өзекті тақырыбына айналды.  

Бас инженер Берік Бекжанов Дүниежүзілік еңбекті қорғау күніне орай ұйымдастырылып отырған семинардың маңыздылығына тоқталып өтіп, көпшілікті өндірісте қаза болғандарды бір минут үнсіздікпен еске алуға шақырды.  

Қауіпсіздіктің бұзылуына, оның ішінде еңбек қорғау талаптарының орындалмауы салдарынан өндірісте апат, адам өлімі орын алып жатады. Мұндай жағдайдың алдын алу үшін не істеу қажет деген сауал төңірегінде үлкен әңгіме өрбіді. Семинарға арнайы шақырылған аймақтық кәсіподақтар бірлестігі төрағасының орынбасары Марат Серікбайұлы жергілікті жерлерде қоғамдық инспекторлардың білімін жетілдіру курстарын ұйымдастырудың маңыздылығына тоқталды.  

Техникалық инспекторларға жүктелетін жұмыс үшін қосымша ақы төленбейді. Сондықтан ақысыз жұмыс істеуге құлықсыздық танытып, оны жүрдім-бардым атқару оң нәтиже бермейтіндігі, болашақта осы олқылықтан шығар жол қарастыру қажеттігі де өткір сөз болды. Кейде техникалық талаптарды мәжбүрлі түрде бұзып жұмыс жасауға тура келетіні, еңбек қорғау талаптарының өрескел бұзылуы орын алатыны да айтылды. Осындай қателіктердің салдары адам өміріне қауіп төндіріп, оның соңы бақытсыз жағдайға әкелуі мүмкін екені, сондықтан одан шығар жол тауып, дер кезінде басшылыққа ескертуден қаймықпау қажеттігі, тіпті қағаз жүзінде кәсіподақ ұйымдарына, басшылыққа жазып, кемшілікке көз жұмып қарауға болмайтыны ескертілді. «Қазкөліккәсіп» ҚБ Қызылорда филиалының төрағасы Бауыржан Ахметов, еңбек қорғауда елеусіз ештеңе жоқ екенін, кішкентай кемшіліктің үлкен зардабы болуы мүмкін екенін мысалмен жеткізді.  

Семинарға қатысушылар теміржол саласында орын алған қайғылы жағдайлардың себептері мен салдарын саралап, ондағы адами фактор, қауіпсіздік қағидалары төңірегінде өзара пікір алмасты. Өткен жылдың қорытындысы бойынша үздік еңбек қорғау инспекторы атанып, компания басшылығы тарапынан қаржылай сыйлық алған Шиелі өртке қарсы қызмет маманы Жалғас Имантаев өз тәжірибесімен бөлісті.  

Семинарда блиц-сауалдарға үздік жауап беріп көзге түскендер мен дұрыс инспекторлар бөлімше басшылығы мен кәсіподақ ұйымы атынан алғыс хат, түрлі марапаттарға ие болды. Инспекторларға үй тапсырмасы ретінде еңбек қорғау талаптары жасырылған сөзжұмбақтар табысталды.