Еңбекті қорғауға үлес қосқан теміржолшылар марапатталды
Тараз қаласы бойынша меншікті тілші
Дүниежүзілік еңбек қорғау күні қарсаңында Сары-Шаған электрмен жабдықтау дистанциясында қауіпсіз жұмыс орындарын жоғары деңгейде ұйымдастырып, еңбекті қорғауды арттыруға қосқан үлесі үшін бір топ теміржолшы марапатталды.
Жиналғандар алдымен бір минут үнсіздікпен өндірісте қаза болған әріптестерін еске алды. Кезек марапатқа келгенде, еңбекті қорғау жөніндегі жетекші инженер Айна Байтенова, электромеханик Александр Кабанов, Қаражыңғыл станциясының электромеханигі Жұмакүл Мизамбекова, Мыңарал станциясының электромеханигі Әуесхан Акижановтар мерейі үстем болып, қаржылай және бағалы сыйлықтарға ие болды. Үздік цехтар қатарында Қашқантеңіз, Мыңарал, Новалы станцияларындағы цехтар аталып, марапатқа лайық деп танылды.
– Осыдан алты-жеті жыл бұрын, 2016 жылы әріптесіміз, электромеханик Ерлан Сарахметов өндірісте қаза тапқан болатын. Бүгінгі жиыннан соң біз әріптесіміздің отбасында болып, оның ата-анасымен, жарымен кездесіп, әңгімелесіп, сый-сияпатымызды ұсынып қайттық – дейді Сары-Шаған электрмен жабдықтау дистанциясы кәсіподақ ұйымының төрайымы Нұржан Кенжеғараева.
