Күзет қызметінде кінәрат жоқ

«Әскерилендірілген теміржол күзеті» ЖШС Атырау филиалының күзетшілері өз міндеттерін мінсіз атқарып, объектілер мен жүктердің күзеті мен теміржол қозғалысының қауіпсіздігін жүзеге асыруда.  

«ӘТЖК» Атырау филиалында бүгінде 578 адам жұмыс істейді. Теміржол торабындағы арнайы күзет қызметін жүзеге асыратын жалғыз құрылымның аймақтық бөлімшелері де жыл сайын жаңарып, дамып, жетіліп келеді. Болашақта қосымша объектілер көбею мүмкіндігіне орай қызметкер саны да артуы мүмкін.  Атырау филиалының қызмет көрсету учаскесінің жалпы ұзындығы 2163 шақырым. Оның ішінде Атырау 770, Маңғыстау 1393 шақырым. Күзет сарбаздарының қатарында жас мамандармен қатар, бұрынғы ішкі істер қызметінің, ұлттық қауіпсіздік комитетінің қызметкерлері мен әскерилер де бар.  

Атырау филиалының жұмыс барысы туралы мән-жаймен қанықтырған оның  басшысы Ербөлеков Серік Қабашұлының айтуынша, филиалдың құрамында 11 команда мен топтар бар. Олар – Атырау облысында Сағыз, Мақат, Құлсары, Атырау, Ганюшкино, Маңғыстау облысында Бейнеу, Манғыстау, Сай-Өтес, Өзен станцияларында, шұғыл әрекет ететін оңтайлы топ және биыл шілде айында қайта қабылданған стратегиялық маңызы бар Атырау станциясындағы Орал және Соколок өзені арқылы өтетін темір жол көпірін күзететін атқыштар командалары. Күзет қызметі сарбаздары қатарында ерен еңбегімен көзге түсіп жүргендері аз емес. 1982 жылдан бері үздіксіз жұмыс жасап келе жатқан бірінші санатты маман, «Адал еңбегі үшін» белгісінің иегері Н.Морозов, Ресеймен шекаралас, Астраханьмен шектесіп жатқан Ақсарай және Ганюшкино станциясында, ең бір жауапты әрі қиын да күрделі аймақтағы күзетші С.Тұрақбаев, Сағыз командасы басшысының орынбасары Қ.Адайбаев және басқа да азаматтар қырағы қызмет етіп, өз міндеттерін үлкен жауапкершілікпен атқарып жүр. Бөлімшеде күзет қызметінің әдіс-тәсілдерін үйрену бойынша техникалық сабақтар, жаттығулар, үнемі өткізіліп тұрады. Жалпы филиал қызметкерлері өз объектілерін жіті бақылап, ұрлық, тонау фактілерін болдырмай, олардың алдын алуда бар мүмкіндіктерін жұмсауда.  

– Күзетшінің жұмысы өміріне және денсаулығына қауіп әкелетін жағдаймен байланысты болғандықтан олар қызметтік қарумен, қорғаныс құралдарымен және арнайы киіммен қамтамасыз етілген. Филиал жағдайы жыл сайын жақсарып, техникамен жабдықталып келеді. Жалақы уақытылы беріледі, әлеуметтік пакет сақталған. Өз қызметкерлеріміздің денсаулық жағдайын жасауға да мүдделіміз. Өндіріс орнында бақытсыз оқиғаға ұрынған адамдарға бір айлық жалақысын сақтай отырып, емделу шығыны төленеді. Басқа да ем-домға медициналық және материалдық көмек көрсетіліп тұрады. Жазда балалар лагеріне жолдама  беріледі, зейнеткерлерге материалдық көмек ұсынылып тұрады, – дейді филиал басшысы.