Пойызда санитарлық ережелер түсіндірілді
![](https://rail-news.kz/uploads/2024/02/01/B5C4pe4RUUup6zvNLErEsvf186k7D6r7CAunRT1B.jpg)
![](https://rail-news.kz/img/noimg.png)
"Қазақстан теміржолшысы" газетінің Жамбыл облысындағы меншікті тілшісі
Жамбыл бөлімшелік көліктегі санитарлық-эпидемиологиялық бақылау басқармасының мамандары Тараз станциясынан жолаушылар пойыздарына отырып, жолсеріктер мен жолаушылар арасында кездесулер өткізді.
Эпидемиолог мамандар «Көкшетау-Қызылорда» бағытындағы №55 жолаушылар пойызында вагондарды аралап жүріп, көпшілікке санитарлық ережелерді түсіндірді. Басқарманың бас маманы А.Қожанов бұл Тараз станциясындағы Желілік полиция бөлімі мен Жамбыл бөлімшелік көліктегі санитарлық-эпидемиологиялық бақылау басқармасының бірлескен жобасы, жолаушылар пойыздарындағы санитарлық сақтық шараларын күшейтуді көздегеннен туған бастама екенін айтады.
![](https://rail-news.kz/uploads/attachments/b55dbc51-5bd3-4f5e-ab16-7eae01b732f4-65bb2d5cb5d04.jpg)
«Әйтсе де, санитарлық, жеке гигиеналық тазалықтың – аурудың алдын алуға тигізер септігі көп. Әсіресе алыс жолға шыққанда сақтықты естен шығармау қажет, тек сақтық тазалық қауіпсіздігі болады», – дейді А.Қожанов.
Эпидемиолог мамандардың түсіндіруінше, алыс жолға шыққанда тез бұзылатын тағамдарды алмаған жөн. Бұл, біріншіден, асқазан-ішек ауруларының, тамақтан уланудың алдын алса, екіншіден, вагондардағы санитарлық тазалық сақталады. Сондай-ақ жол үстіндегі жолаушыларға да жайсыздық туғызбайды.
Жалпы дәрігерлер жол үстінде азық-түлік сатып аларда оның қолданыс мерзіміне мән беру керектігін ескертеді. Тағамның жарамдылығынан бөлек, жеке санитарлық, гигиеналық тазалықты сақтау аса маңызды. Тағы бір көңіл бөлетін мәселе – жедел респираторлық инфекциялардың белгілері байқалып тұрса, жолға шықпаған дұрыс.
![](https://rail-news.kz/uploads/attachments/703c528b-9876-4066-9557-4828c741803b-65bb2d61dc111.jpg)