Тараздық күзетшілер мектеп оқушыларына қауіпсіздік сабағын өткізді
"Қазақстан теміржолшысы" газетінің Жамбыл облысындағы меншікті тілшісі
Әскерилендірілген теміржол күзеті Тараз филиалының әкімшілік қызметкерлері және шұғыл әрекет ететін оңтайлы топ күзетшілері 1 қыркүйекте темір жол бойына жақын орналасқан мектептерге барып, профилактикалық сабақ өткізді.
Білім күніндегі алғашқы сабақ темір жол бойында жүріп-тұрудың қауіпсіздік ережелеріне арналды. Мамандар шойын жолда жазатайым оқиғалардың азаймай тұрғанын ескертіп, мұндай фактілерге көп жағдайда зардап шеккендердің қауіпсіздік шараларын сақтамауы себеп болатынын түсіндірді.
– Оқушылар арасындағы профилактикалық іс-шараларды жаңа оқу жылының алғашқы күнінен бастауды жөн көрдік. Жазатайым жағдайлардың салдарын талдаудан бұрын оның алдын алу маңызды. Әсіресе жасөспірімдерге темір жолдың қауіпті аймақ екенін оқу жылының алғашқы күні тағы да еске салу артық болмайды. Қауіпсіздік ережесін бұзғандар жауапкершілікке тартылатыны да ескертілді. Өйткені оқушылар сабаққа асығып бара жатып, жолды қысқарту үшін темір жолды белгіленбеген жерлерден, жақындап қалған пойыздың алдынан кесіп өтуге тырысады. Біздің мақсатымыз – мұның салдары қандай болуы мүмкін екенін ашық айтып ескерту. Мұғалімдерге, ата-аналар мен оқушыларға әр істің жауапкершілігі бар екенін еске салу, – дейді Әскерилендірілген теміржол күзеті Тараз филиалының директоры Еркін Мүсілімов.