Қызылорда жолаушылар вагондарын жөндеу депосының ұжымы байырғы теміржолшымен кездесті

Жолаушылар вагондарын жөндеу депосының ұжымы ардагерлер кеңесінің төрағасы Сисенбі Шермахановпен кездесіп, тәуелсіздіктің алғашқы жылдарындағы естеліктерін тыңдады, деп хабарлайды Rail-news.kz. «Нұр Отан» партиясының «Теміржол» филиалы төрағасының орынбасары Базара Танбаеваның ұйымдастырумен өткен кездесу қызықты да тағылымды болды. Сисенбі Шермаханов жас әріптестері тарапынан «Тәуелсіздіктің алғашқы жылдары қиындықтарды қалай шештіңіздер, кімдер көмек жасады, пойыздар қозғалысы қалай ұйымдастырылды, вагондарды жөндеу жұ- мыстары қалай жүрді?» деген сұрақтарға жауап беріп, естеліктерімен бөлісті.

– Ел тәуелсіздігі жарияланған уақытта мен Қызылорда вагон жөндеу депосының дайындау цехында шебер болдым. Вагондарға қажетті қосалқы бөлшектерді дайындау маған жүктелген еді. Алғашқы жылдары жиналған қор пайдаланылды, уақыт өте олар да түгесіле бастады, сырттан келетін ештеңе жоқ, енді оны өзіміз іздеуге шықтық. Осы жерде айтылуы тиіс мына нәрсе, теміржол саласының қайраткері Н.Есенғарин Одақ кезінде Жол қатынастары министрлігінде жұмыс істеген тәжірибелі де беделді адам болғандықтан тәуелсіздіктің алғашқы жыл- дары Қазақстанның теміржол саласына көп көмегі тиді. Біздерге қатысты сұрақтардың мүмкіндігінше оңтайлы шешіліп, орталықтан көмек берілудің жолын қарастырып, көп жәрдем жасады. Ол кісі тек біздің бөлімшеге ғана емес, бүкіл еліміздің теміржолы қозға- лысының тоқтамауына орасан күш жұмсады, – деп еске алады Сисенбі Шермаханов.

Вагондарды жөндейтін құрал табылғанмен, қажетті бөлшектердің жеткілікті болма- уынан он вагонның ішінен жарамсыз бір вагонды «құрбандыққа» шалып, барлық бөлшектерін алып жөндеуді қажет ететін вагондарға салып, қиындықтан шыққан аға буынның ерлікке пара пар еңбегі шынында құрметке лайық еді.

– Вагон бекітпелеріне керекті бұранда мен оның асай-мүсейлерін қолдан құйып шығаруға мәжбүр болдық. Ол үшін қаладағы темір-терсек қабылдап дайындайтын «Чермет» мекемесінен жаңағы өлшемдегі бұрандаларды, бөлшектерді жасап шығаруға жарайтын темір әкеліп беріп, олар оны қолдан құйды. Осылайша жоқтан бар жасап күн көріп, вагондардың депода тұрып қалмауын жүзеге асырдық. Тәуелсіздіктің тұсында қандай қиындық болса да уақытша деп қабылдадық, қолдан келгенше әрекет жасап, алдағы жарқын күндерге қадам бастық, – дейді ардагер.