Сыр елінің теміржолшылары көктемгі тазалық жұмыстарын бастады
Қызылорда облысы бойынша меншікті тілші
Алты ай қыстан кейін табиғатананың тоңы жібіп, тіршілік жанданып, жасарып-жаңғыруы жүретін көктемнің алғашқы айы тУды. Теміржолшылар үшін дәстүрге айналған тазалық айы басталды.
Қазақстан темір жолы бойындағы станция-бекеттерде кең ауқымда тазалық жұмыстары жүргізілуде. Теміржолшылар айналаны қыс бойы жатқан күл- қоқыстан тазартып, ағаштардың түбін қопсытып, ақтап, жаңадан тал-дарақтар отырғызуда.
Сыр елінің теміржолшылары биыл 15 наурызды табиғатпен үндестік күні деп жариялап, жалпы тазалық жұмыстарына ұластырды. Қызылорда теміржол вокзалында, Қызылорда электрмен жабдықтау және Қызылорда белгі беру және байланыс дистанциясының шеберханаларында басталған жұмыстар Қызылорда магистральдық желі бөлімшесіне қарасты Шиелі өрт сөндіру пойызында жалғасты. Ауысымдағы өрт сөндірушілер аулада өсіп тұрған ағаштардың түбін қопсытып, ақтап, тыңайтқыштар төгіп, кей жерлерге жаңадан ағаш көшеттерін екті. Ал сәуір-мамыр айларында гүл отырғызу жұмыстары басталады.
Жалпы, бөлімшенің оңтүстігіндегі станцияларда көктемнің лебі алғаш сезіледі. Қылтиып көрінген көк жылылықтың, көктемнің хабаршысындай болатыны рас. Биылғы қыс жұмсақтық танытты, содан болса керек, аймаққа көктем ерте келді. Сондықтан, наурыздың он төртінен бастап жыл қайыра бастайтын сыр халқы биыл да білек сыбана шаруасын қамдауға кірісіп кетті.