Сыр еліндегі наурыз мейрамы кезінде спорт түрлерінен жарыс ұйымдастырылды
Қызылорда облысы бойынша меншікті тілші
Наурыз мерекесін сыр елінің теміржолшылары ақ таңға ақсарбас айтып, құрбан шалудан бастады. Қызылорда жол дистанциясының ауласында қазан-қазан ет пісіп, наурыз көже дайындалып жатты.
Ал Қызылорда локомотив пайдалану депосында сайыстың бірнеше түрінен жарыс ұйымдастырылып, көпшілік арқан тартыс, балуан күрес, асық ату сынды ұлттық өнерді ұлықтады. Магистральдық желі бөлімшесінің жеке шаруашылығында шахматтан жарыс өтті. Бөлімшенің солтүстігіндегі Сексеуіл жол дистанциясында, Қазалы вагон пайдалану депосында, Теміржол- су-Қызылорда мекемелерінде де мерекелік салтанатты шаралар мен түрлі сайыстар өтіп, жеңген де, жеңілген де сый-сияпатқа қарық болып жатты. Кәсіподақ ұйымы еңбек озаттарының марапатталуына мұрындық болды.
Қызылорда магистральдық желі бөлімшесі жеке құрамының теміржолшылары жеті минуттық «блиц» форматындағы шахмат турнирін Көліккәсіподақтың 30 жылдығы мен Наурыз мерекесі құрметіне өткізді. Турдың жеңімпазы машинист-нұсқаушы Асылхан Құланбаев болды. Одан кейінгі жүлделі орынды машинист көмекшісі Нұрлан Есеналиев, үшінші орын жетекші инженер Еркебұлан Смай- ловтың қанжығасына байланып, барлығы да бағалы сыйлықтарға ие болды.
Енді бір топ жігіттер боз кілем үстінде қол күресінің көрігін қыз- дырып жатты. Одан кейін депо машинистерінің 6 колоннасынан алты құрам шығып, арқан тарту басталды. Қазалы мен Шиелі айналым деполарынан келген өкілдер кір тасын көтеру, балуан күресіне қатысып жүлде алды. Арқан тартудан 1-орын Нұрғалиевтің колоннасына, 2-орын Шамшиевтің, 3-орын Садықовтың батырларына бұйырды.
Жалпы Наурыз мерекесін жоғары көңіл күймен қарсы алған қызылордалық теміржолшылар арасында жүлдесіз қалғандар некен-саяқ болды. «Бәйге берем жығылған балуанға да, адалдығы сезіліп тұрар болса...» демекші, бейбіт елдің аспанына шашылған наурыз шуағын қарсы алған көпшіліктің дархан көңілі кемерінен асып төгіліп жатты...