Сыр елінің теміржолшылары соғыс ардагеріне сый-сияпат көрсетті
Қызылорда облысы бойынша меншікті тілші
Қызылордалықтар үшін Любовь Сергеевна Колесник «Люба әжей» атанғалы қай заман. Соғысқа осы қаладан аттанған әжеміздің туған жері де алыс емес, мынау тұрған Арыс қаласы.
1925 жылы Түркістан облысының Арыс қаласында әскери қызметкерлер отбасында дүниеге келген Любовь Сергеевна соғыс басталғанда Қызылорда медициналық техникумында оқып жүрген жас қыз екен. 1941 жылы отбасымен Сыр еліне қо- ныс аударған. Дәрігерлік мамандық алған Люба әжей бір топ құрбыларымен соғысқа аттанып, 1-ші Белоруссия майданы құрамында Германияға дейін ба- рады. Дала госпиталінде жараланған жауынгерлерге дәрігерлік көмек көрсетіп, талай сарбазды жаңбырдай жауып тұрған оқ арасынан алып шығып, ажалдан арашалап қалады.
1945 жылы көктемде неміс фашистерінің мұздай қаруланған әскерінің күл-талқанын шығарған кеңес одағының жеңімпаз жауынгері болып жеңісті Германияның Ной-Репен қалашығындағы шағын дәрігерлік пунктте (санчасть) қарсы алған. Көп ұзамай кеудесі орден-медальға толы медицина саласының запастағы капитаны жеңіспен елге оралады. Қызылорда паровоз депосының медпунктіне фельдшер болып орналасып, зейнет жасына жеткенше жұмыс жасайды. Биылғы жеңістің 77 жылдық мерекесі қарсаңында 97 жасқа толғалы отырған ардагер қазіргі таңда көп қабатты үйдегі екі бөлмелі пәтерде 71 жастағы қызы Татьянамен бірге тұрады.
Кеше аймақ теміржолының ардагерін Қызылорда жол дистанциясының ұжымы атынан кәсіподақ ұйымы төрайымы Ғалия Ноғайбаева мен кадр бөлімінің маманы Назым Нәрікбаева жеңіс мерекесімен құттықтай барып, құшағын гүлге толтырып, азық-түлік себетіне қоса қаржылай қаражат табыс- тады.
– Әуе шабуылы кезінде жаралылардың жанынан табылып, оларды тыныштандыруға тырысатынбыз. Өзіміз қорқып тұрсақ та жауынгерлерге сездірмеуге тырысамыз. Кейде үмітсіз жағдайдағы жауынгерді жұбатарға сөз таппай, айнала бере жылап алатынбыз. Дала госпиталі жеңіл жаралыларға арналғанмен, кейде ауыр жараланған жауынгерлер де жатқызылатын. Тәулік бойы жұмыс жасайтын дәрігерлер құрамы оларды кезекпен күтіп, соңымыздан келетін санитарлық пойызға тиеп жіберетінбіз, қаншасы жолда өлетін, – дейді қанқұйлы соғыс сұмдығын есіне алған майдангер.
– Қазір саусақпен санарлықтай сиреп қалған ардагерлер – тарихтың тірі куәгерлері. Олар Отанды жаудан қорғап қана қойған жоқ, соғыстан кейін елдің іргесін көтеруге атсалысты, аймақ теміржолының өркендеуіне үлес қосты. Солардың бірі – біздің Люба әжей. Оларды қалай құрметтесек те жарасады, – деді кәсіподақ ұйымының төрайымы Ғалия Ноғайбаева.