ҚТЖ ұжымы соғыс көрген ардагерлерге сый-құрмет көрсетті
«Қазақстан темір жолшысы» газетінің тілшісі
«ҚТЖ» ҰК» АҚ Отан қорғаушылар және Жеңіс күні мерекелерін арнайы бағдарлама шеңберінде атап өтті. Ұлттық компанияда 22 ҰОС ардагері, Халықтық жол және қатынастар комиссариаты арнайы құрылымдарынан 5 адам және 2881 тыл еңбеккері есепте тұр.
Мереке қарсаңында жас теміржолшылар 85 ардагерге азық-түлік себетін табыстаса, өздігінен жүріп-тұратын 65 тыл еңбеккері мен сала ардагерлері салтанатты жиынға арнайы шақырылды. 6 мамыр күні елордалық ардагерлер мен тыл еңбеккерлері «Отан-Ана» Отан қорғаушылар монументіне гүл шоқтарын қойып, соғыста қаза тапқан майдангерлерді еске алды. Мерекелік шара компанияның орталық ғимаратында өткен концерттік бағдарламамен жалғасып, Жеңіс күніне орай компания қызметкерлерінің соғысқа қатысқан туыстарының суреттері компания сайтында жарияланып, орталық ғимараттың үшінші қабатында ілінді.
Концерттік бағдарлама әдеттегідей компанияның өнерпаз қызметкерлерінің күшімен ұйымдастырылды. Соғыс және тыл ардагерлерін компания жастары қызыл кілеммен өткізіп, қошеметпен қарсы алды. Сахнада «Әскери вальс», «Катюша», «Көк орамал» билері орындалып, соғыс кезіндегі әндер шырқалды.