Жамбылдық майдангерлер де Жеңіс күні қошеметке бөленді
Ұлы Жеңістің 77 жылдығы - Жеңіс күніне орай жамбылдық теміржолшылар қарт майдангерлердің отбасында болып құттықтап қайтты. Жамбыл Жүк тасымалы бөлемшісенің директоры Молдахмет Қожабеков, кәсіподақ комитетінің төрағасы Серік Ақшорав алдымен Жамбыл желілік ішкі істер бөлімінің ардагері Иван Макеевтің шаңырағында болды.
1927 жылдың 10 шілдесінде Тамбов облысының Мучкапск ауданының Мучкап селосында дүниеге келген ардагер Забайкалье майданында ерекше мақсаттағы радиодивизионның барлаушысы болып қызмет еткен. Харбин, Мукден, Чань—Чюнь қалаларын азат ету шайқастарына қатысты. Соғысты Чань-Чюнь қаласында аяқтайды.
Иван Макеев 1951 жылға дейін осы қалада әскери қызметте болып, 1952 жылдан бастап милиция органдарында, Жамбыл стансасы желілік ішкі істер бөлімінде қызмет етеді. 1967 жылы Алматыдағы жоғары милиция мектебін бітіріп, оперативтік қызметкерден ОБХСС бастығына дейінгі қызмет жолынан өтеді. Подполковник атағын алған. «Отан соғысы» орденімен, «Германияны жеңгені үшін», «Жапонияны жеңгені үшін» т.б. мерекелік медальдарымен марапатталған.
Сондай-ақ, екіншүі майдангер Базарбай Бүрбаевтың шаңырағында болған теміржолшылар қарияға ұзақ өмір тілеп, ақ батасын алды. 1924 жылы 10 желтоқсанда Жамбыл қаласында дүниеге келген Базарбай қария 1942 жылы әскерге шақырылып, арнайы дайындықтан өткен соң 393-атқыштар полкінде минометші болады. Манчжурия, Мугден, Харбин тағы басқа қалаларды азат етуге қатысқан.
«Қызыл жұлдыз» ордені, «Ерлігі мен қайсарлығы» үшін», «Жапоноияны жеңгені үшін» медальдарымен марапатталған майдангер әлі тың. Ол 1949 жылдан 1988 жылға дейін Жамбыл локомотив депосында үздіксіз машинист болып еңбек етті.
