Ақтөбеліктер Жеңіс күніне орай "Ардагерлерге тағзым" акциясын ұйымдастырды
Ақтөбе облысы бойынша меншікті тілші
9 мамыр - әрбір қазақстандық үшін ерлікке, Отан үшін от кешкен батырлар рухына тағзым ететін күн. Әрдайым ардагерлерге құрмет көрсетудің озық үлгісін жасайтын теміржолшылар айтулы мерекеде еңбек майдангерлерін де құттықтады.
Ұлы Отан соғысына қатысқан майдангерлер саусақпен санарлық. Теміржолшылар арасында еңбек майданында болған ардагерлердің өзі сиреп қалды. Мереке күні Ақтөбе магистральды желі бөлімінің кәсіродақ ұйымы "Ардагерлерге тағзым" акциясын ұйымдастырып, теміржол саласында ұзақ жыл еңбек еткен тыл ардагерлері Екатерина Бережная мен Алтынай әжейдің шаңырағына барып, Жеңіс күнімен құттыктады.
«Отан үшін жанын қиып, еліне жеңіс сыйлаған батырларымызды еске алу, оларға құрмет көрсету парыз. Батыр бабаларымыздың ерлігі жастарға үлгі-өнеге. Олар ел мен жерін қорғап, қан майданда от кешті. Сол оқ пен оттың арасынан аман оралғандары елдің қайта түлеуіне, дамуына үлесін қосты. Мұның бәрін қазіргі ұрпақ біледі, ешқашан ұмытпайды», - деді Ақтөбе магистральды желі бөлімінің кәсіподақ басшысы Айша Қалағанова.
Сонымен қатар, Бершүгір жол дистанцисының ұжымы тыл ардагерлері Збира Жүгініс, Сағынай Құлжан, Қалия Күзембаева, Ыбырайым Сейсенбі және Өтепберген Қалдин есімді қариялардың шаңырағында болып, ардагерлерге себет толы жемістер мен бағалы сыйлықтар табыс етіп, мерекемен құттықтады.
