Шымкенттік теміржолшылар сенбілікке шықты
Шымкент қаласы бойынша меншікті тілшісі
Өткен аптада «Тазалық – денсаулық кепілі» атты ұранмен Шымкент магистральдық желі бөлімшесінің ұжымы сенбілік өткізіп, әкімшілік ғимараттың алдын, субұрқақтың айналасын, техникалық автотұрақ маңайын қоқыстар мен қалдықтардан тазалады.
Теміржолшылар сенбілігін ұйымдастырған НЖС-9 бас инженері Мұхтарбай Битемировтің айтуынша, тазалық жұмыстары әріптестер арасында дәстүрлі түрде өткізіліп тұрады. Бұл жолы да өздері отыратын ғимарат айналасын, жұмыс орындарын талапқа сай келтіруді қолға алып, сенбілік өткізуді де бірі бастап, қалғаны қоштап, бөлімше қызметкерлері мұрындық болған. «Тазалық табалдырықтан басталады» демекші, теміржол бөлімшесі орналасқан жердің көз тартар көрікті де таза болғаны ең алдымен өздері үшін жақсы және «сырт көз – сыншы» демекші, келген-кеткен елден де ұялмайтындай болу керек деп санайды жергілікті теміржолшылар.
Сенбілікке жұмыла кіріскен жұмысшылар түске дейін айнала төңіректі айнадай етіп тазалап, қоқыстарды шығарып тастады.