Ақтөбеде оқушыларға қауіпсіздік ережелері түсіндірілді
Ақтобе облысы бойынша меншікті тілшісі
«ҚТЖ-Жүк тасымалы» ЖШС «Батыс» филиалы Ақтөбе локомотив пайдалану депосында қауіпсіздік акциясын өткізді. Соның аясында теміржолшылар мектеп оқушыларымен және өткелдер бойындағы жолаушылармен кездесіп, түсіндіру жұмыстарын жүргізді.
Стратегиялық аймақта қауіпсіздікті қамтамасыз ету – теміржолшылар жұмысындағы аса маңызды да басымды бағыт. Әр аптаның 7 күн, 24 сағатын теміржол бойындағы қауіпсіздікке арнайтын теміржолшылардың еңбегін еш, тірлігін зая қылатын жайттар, өкінішке орай, жоқ емес. Оған себеп – пойыздардың қозғалысына кедергі келтіріп, өз өмірлеріне қауіп төндіретін жандардың бейғамдығы.
Ақтөбе локомотив пайдалану депосының өндірістік қауіпсіздік және экология секторы меңгерушісі міндетін атқарушы Қайрат Данияров бастаған топ қаладағы №22, 42 мектептерге барып, оқушылармен қауіпсіздік сабағын өткізді. Локомотившілермен бірге топ құрамындағы әскерилендірген күзет қызметі, желілік полиция қызметкерлері балаларға теміржол маңында ойнаудың қандай қауіпті екенін түрлі мысалдармен түсіндірді. Сақтық ережелері жазылған брошюралар таратылды.
«Балалардың жазғы каникулы жақындап келеді. Әрине мұндай кезде теміржол маңында орналасқан елді мекендердің бала-шағасы үлкен қауіп тудыратыны жасырын емес. Шағын ауылда стадион, ойын алаңы жоқ, балалар теміржол маңына ойнайды. Ешкім мені пойыз басып кетеді деп ойламайды. Оқыс оқиғалар басқа елде, басқа біреулермен болып жатқандай қабылдайтындар ертең өздері де сондай оқиғаға ұрынып қалатындарын ойламайды», – деген Қайрат Данияров балаларға қарата: «Тек қана қауіпсіздік, тек қана қауіпсіздік сенің қорғаның екенін естен шығармаңдар!» деп тағы да ескертті.
Түсіндіру тобы теміржол өткелдеріне де барды. Жаяу жүргіншілерге жолдан өтер алдында радио хабарландыруларға құлақ асу керектігі түсіндірілді. Бекітілген ереже мен талапқа бағынбайтындар қандай әкімшілік жазаға тартылатыны да ескертілді.