Даңқты теміржолшылардың жәдігерлері Аягөз мұражайына тапсырылды
Абай облысы бойынша меншікті тілші
Аягөз станциясы – теміржол саласының даңқты өкілдері, әсіресе локомотив шаруашылығы бойынша әйгілі династиялар шыққан өңір. Сондықтан да болар, бүгінгі таңда Аягөзде аймақтың мақтаныштары саналатын еңбек ерлерін есте сақтау мақсатында көптеген игілікті шаралар жиі ұйымдастырылады.
Есімдері тек Аягөзге ғана емес, күллі республикаға танымал әйгілі Тоқсанғазиндер әулеті жайлы жәдігерлер мен мол мұрағат деректері Аягөздегі облыстық өлкетану музейінің филиалындағы көрмеден, ондағы «Ұлылар мекені – Аягөз» атты экспозициялық бөлімінің төрінен орын алған. Онда «Құрметті теміржолшы», атақты машинист, білікті инструктор болған теміржолшы Жұмағазы Тоқсанғазин бастаған династия өкілдері жайлы мол мағлұмат берілген.
Жуырда аталмыш мұражайға теміржол ардагерінің ұлдары Сұлтан мен Болат Тоқсанғазиндер арнайы түрде ат басын бұрды. Олар музей қорына өмір жолдары теміржолмен біте қайнасқан Тоқсанғазиндер әулетінің белді мүшесі, ұзақ жылдар бойы Семей ЖТ бөлімшесінің бас ревизоры болған «Құрметті теміржолшы» Сайлау Түсіпұлының қызметтік формасын, медальдарын салтанатты түрде тарту етті. Сонымен қатар, әйгілі династия мүшелері өз туыстары Сайлау Юсуповтың ғұмыры мен еңбегінен сыр шертетін, белгілі қаламгер Жұматай Оспанұлының «Теміржолдан басталған өмір жолы» атты кітабын да сыйға берді.
Әр жылдарда «Локомотив» АҚ атқарушы директоры, Матай станциясындағы локомотив шаруа- шылығының басшысы сынды түрлі лауазымды қызметтерді абыроймен атқарған Сайлау Түсіпұлының есімі өмірден өтсе де, өлмейтұғын із қалдырған аягөздік даңқты теміржолшылар тізімін осылайша толықтырды.