Медпойыз Тұманды тұрғындарының денсаулығын тексерді
Атырау облысы бойынша меншікті тілші
«Жәрдем» емдеу-диагностикалық пойызы Атырау өңіріндегі алғашқы жұмыс күнін үш жүзден астам тұрғыны бар шағын разъезд Тұманды бекетінен бастады.
Ауыл тұрғындарының ішінде тегін медициналық тексеруден өтуге ынта білдіргендер көп. Солардың бірі – станция кезекшісі Жомарт Өтепов темір жолда 42 жылдан бері еңбек етіп келеді. «Бұрыннан «Жәрдем» пойызы келгенде тексеріс- тен өтіп алуға, білікті мамандарға қаралып, денсаулығымызды түзеп алуға тырысамыз. Мамандардың барлығы бір пойыздың ішінде. Менің қан қысымым көтеріліп, соны өлшетіп отырмын, содан соң терапевтке барамын. Пойыздың нақ осы бекетке келгені қандай жақсы болды. Жұмысбасты боп дәрігерге қаралуға уақытымыз бола бермейді», – дейді ол.
Пойыздың станция басында ыңғайлы жерге қойылып, жан-жақты ем жүргізуіне, ауыз су, электр желісі, тағысын тағы қажетті дүниелермен жабдықталуына жағдай жасау мақсатында Атырау жол дистанциясы директорының орынбасары Хамидолла Ғарипов арнайы келіп, теміржолшылармен бірге көмек қолын созды.
– Тұманды бекетінде дәрігерлер халықты таңғы 9-дан бастап кешкі 18.00-ге дейін қабылдап жатыр. Бірінші күннің өзінде елуден астам тұрғын келіп тексеруден өтті. Негізінен жергілікті тұрғындарда қан қысымының жоғарылауы, буын аурулары жиірек ұшырайды, сондай-ақ ішек құрылысы, көз көру нашарлығы, жүрек аурулары да бар, – дейді бас дәрігер Айнұр Егінбаева.
Атырауға маусымның 13-інде келген медициналық пойыз аймақта осы айдың аяғына дейін болады. Тұманды бекетінен кейін, 14-15-сі Аққыстау, 16-17-і – Нарын, 18-і – Исатай, 20-сы – Афанасьево, 22-сі – Ганюшкино, 25-26 – Жамансор, 27-28 – Мұқыр станциясының тұрғындарын қабылдайды.