Теміржолшылар құрметіне мемориалдық ескерткіш тақта қойылды
Ақтөбе облысы бойынша меншікті тілші
Саналы ғұмырын отандық теміржол саласының дамуына арнаған Мурзалиновтар әулетін ақтөбелік теміржолшылар жақсы біледі. Қотыртас станциясын 41 жыл басқарған әкелі-балалы теміржолшылар құрметіне мемориалдық ескерткіш тақта қойылды.
Қос теміржолшы – Нұрмұханбет Мурзалинов пен Садық Мурзалиновке арналған мәрмәр тақта Қотыртас станциясы ғимаратының қабырғасына ілінді. Қарапайым жұмысшыдан басшылық лауазымға дейін көтерілген әкелі-балалы Мур- залиновтар 1944-1990 жылдар аралығында Қотыртас станциясына басшылық етіп, оның дамуына өлшеусіз үлес қосқан.
Нұрмұханбет Мурзалинов 1903 жылы қазіргі Ақтөбе облысы Шалқар ауданында дүниеге келіп, еңбек жолын 18 жасында сол кездерде Орынбор теміржолына қарасты №59 разъезде жұмысшы болып бастаған. Төрт жылдан соң №6 жол учаскесінің 57-околоткасына жол жөндеу- ші болып ауысады. Тәжірибе жинақтай келе бағыттаушы, станция кезекшісі қызметтерін атқарады. Теміржол көлігін дамытудағы ерен еңбегі еленіп, 1935-1944 жылдар аралығында Нұрмұханбет Мурзалинов бірнеше рет марапатқа ие болады және пойыздар қозғалысын ұйымдастырудағы шеберлігі мен міндеттемесін асыра орындағаны үшін оған алғыс жарияланады. Ал 1944 жылдың тамызында өзі қызмет атқарып жүрген Қотыртас станциясының бастығы болып тағайындалып, сұрапыл соғыс жылдарында аянбай еңбек еткен теміржолшы «Ленин» орденімен марапатталған.
«Әке көрген оқ жонар» демекші, Садық Мур- залинов та еңбекке 16 жасынан араласып, 1944 жылы Қотыртас станциясына бағыттаушы болып жұмысқа алынады. Соғыстан кейін ұзақ жыл станция кезекшісі қызметін атқарып, 1969 жылдың қыркүйегінен 1990 жылдың шілдесіне дейін Қотыртас станциясын басқарып, зейнеткерлікке шығады.
Жалпы Мурзалиновтар әулетінің еңбек өтілі – 350 жыл. Кейінгі ұрпақтары да атакәсіпті жалғап, бүгінде теміржолдың әр саласында тер төгіп жүр.
«Атамыз бен әкеміздің даңқты еңбек жолы – біздер үшін мақтаныш. Теміржол саласының тұрақты дамуына қосқан көп жылғы елеулі үлес- тері және мінсіз де адал еңбектері үшін 2015 жылы Мырзалиновтар әулетіне «Қазақстан темір жолы» ҰК» АҚ президентінің алғыс хаты берілді. Бұл – біздің әулетіміз үшін үлкен абырой», – дейді Ілияс Садықұлы.