Кәсіподақ белсенділері 72 балаға оқу құралын берді
Қызылорда облысы бойынша меншікті тілші
Республикалық «Мектепке жол» қайырымдылық акциясының салмағы кез келген істің ауыртпалығын жұмыла көтеріп, жүгін жеңілдете білетін кәсіподақ ұйымына түсіп отыр, деп хабарлайды Rail-news.kz.
Бұның алдында Қызылорда магистральдық желі бөлімшесінде атқарылған шара бүгін Қызылорда қосалқы бөлімінде жалғасып, одан аймақтарға да жетіп, кәсіподақ белсенділері 72 балаға мектепке дайындық сөмкесін таратып, сыйлық жасады. Алдағы күндерде шара жекелеген мекемелерде де жалғаспақ.
– Отбасында ең кемі төрт және одан да көп балалары бар теміржолшыларға әлеуметтік көмек көрсету мақсатында ұйымдастырылған акция жаңа оқу жылында балалардың мектепке бармай қалуының алдын алып, олардың алаңсыз білім алуына барынша мүмкіндік жасауға атсалысады. Акция барысында мектеп құралдары толтырылған сөмкелер мен спорттық киімдер берілді, – деді кәсіподақ төрайымы Ғалия Қожахметова.