Теміржолшылар табысы артты
Тараз қаласы бойынша меншікті тілші
«ҚТЖ» ҰК» АҚ – Жамбыл Магистральдық желі бөлімшесінің директоры Сұлтан Борамбаев Шу өңіріндегі темір жол мекемелерінің ұжымымен кездесу өткізді, деп хабарлайды Rail-news.kz.
Күзгі комисссиялық байқау кезіндегі анықталған кемшіліктерді талқылаған жиында алдағы қысқа дайындықпен қатар жаңадан енгізіліп жатқан өңірлік коэффициент, оның төлену тәртібі сөз болды. Бөлімше басшысы бүгінде жаңа жүйе бойынша бір облыс ішіндегі «учаскелік» өңірлік коэффициенттер қолданыстағы ең жоғары коэффициент деңгейіне дейін артқанын, соған орай қатардағы теміржолшылардың жалақысы айтарлықтай көтерілетінін айта келе, жұмысшылардың сауалдарына да жауап берді.
– Қолданыстағы ең аз «учаскелік» коэффициенті бар облыс учаскелерінде жалақының едәуір өсімі болады. Осы орайда облыстағы ең төмен 1,15 коэффициентіндегі жалақылар ең жоғары 1, 25 коэффициентке дейін көтеріледі. Бұл шара Шу, Бірлік станциялары жұмысшыларының айлығын едәуір өсіреді, – деді Сұлтан Адамбайұлы.
Басқосуда сонымен қатар алдағы Президент сайлауы сөз болып, жамбылдық теміржолшылардың бір кісідей қатысуы қажеттігі айтылды. «Сайлауға қатысып, өз таңдауын жасау – әркімнің азаматтық борышы» деді С.Борамбаев.