Қызылордалық теміржолшылар қарттар күнін ерекше атап өтті
Қызылорда облысы бойынша меншікті тілші
«Қарты бар үйдің қазынасы барын» еске ұстайтын сыр елінің теміржолшылары қарттар күнін ерекше форматта атап өтті. Қызылорда белгі беру және байланыс дистанциясы кәсіподақ ұйымының ұйытқы болуымен шеберхана ауласына шатыр тігіліп, зейнеттегі ардагерлерді шақырып, құрмет көрсетті.
Шатыр астындағы кездесуде бір-бірімен дидарласқан қариялар жас ұрпаққа насихат ретінде өткен жылдардан естелік шертті. Осы ұжымда жұмыс жасап өмірден өткен әріптестерін еске алып, рухына құран бағыштады. Ардагерлердің сүбелі сөзін тыңдаған жастар жағы оларды бүгінгі жетістіктермен таныстыруды да ұмытпады. «Ол кезде жұмыстың барлығы қолмен атқарылатын, жұмысым қиын деп ешкімнің шағымданғанын көрмедік, байланыс желілерін шойын жолды қапталдай қолмен қазып орнататынбыз. Бүгінгідей жұмыстың бәрі бір ғана тетік-пультпен, барлық жұмыс заманауи техникалармен басқарылатын заманды армандаған да жоқпыз» десті ардагерлер бүгінгі техникалық жетістіктерге тамсанып.
Күні кешеге дейін осы дистанцияны ұзақ жыл басқарған Әкімжан Қосановтың зайыбы Гүлсім мен ұлы Роман кешегі ауыр күндерде қара жамылған отбасына қолдау білдірген ұжымға арнайы алғыс айтып, ардагерлерге сый-сияпат жасады.
– Зейнеткерлер өткенді еске алып, дистанцияның ғасырлық тарихына шолу жасағандай болды. Керемет әсер алдық, қарттарымыз аман болып ортамызда жүре берсін, – деді кәсіподақ ұйымының төрайымы Ғалия Қожахметова.
Шара барысында зейнет жасына жеткен Қосымбай Асқаровты құрметті еңбек демалысына шығарып салудың ерекше рәсімі өтті. Дистанцияда электромеханик болып жұмыс жасаған Қосымбай аға ортаға шығып, әріптестеріне алғысын айтып, байланыс желілеріндегі, рельс тізбектеріндегі кернеуді өлшейтін ИПТ-3 құралын өзінің жолын жалғастырып келе жатқан баласы Бауыржан Асқаровқа тапсырды. Ұрпақтар сабақтастығының жарқын көрінісі осы емес пе?!