Қарттарға құрмет көрсетілді
Маңғыстау облысы бойынша меншікті тілші
Түбек теміржолының басшылығы мен кәсіподақ ұйымы қарттар күніне орай қарияларға көңілді кеш сыйлады. Маңғыстау станциясындағы салтанатты мейрамханада жайылған мерекелік дастарханға 250-ге жуық зейнеткер арнайы шақырылды.
Маңғыстау қосалқы бөлімінің бастығы Нәжімеден Ғұбашов, Маңғыстау магистральдық желі бөлімшесінің директоры Мұхтар Бақтыгереев, Орталық теміржолшылар кәсіби одағының өңірдегі өкілі Әзірбай Тұрмағанбетов жиылғандарға құттықтау тілегін арнап, ардагерлердің әрбірінің түбек теміржолының дамуына қосқан ерекше үлесін атап, алғыстарын білдірді.
Қарияларымыз басынан өткен тәжірибесімен бөлісіп, қазіргі буынның жұмысына сәттілік тіледі. Осындай мүмкіндік сыйлап жатқан жандарға шексіз ризашылығын білдірді. Естеліктерден сыр тарқатып, өткен күндерді еске алды. Мысалы, Жаңаөзеннен келген Мұрат Сәриев 1970 жылы Ташкенттегі теміржол институтын бітіріп, Батыс өңіріне жолдамамен келіпті. Кезінде Өзен станциясының басшысы қызметінен зейнетке шыққан қарияның ұлы Самат Сәриев те бүгінде Өзен станциясын басқарады екен. Меймандар қатарынан сөз алған теміржолшы ардагерлер кеңесінің төрағасы Амандық Алдабергенов те замандастарына жүрекжарды тілегін жеткізді. Әсем ән мен тәтті күй кеш ажарын аша түсті.