22 мыңнан астам теміржол қызметкері білімін жетілдіреді
«Қазақстан теміржолшысы» газетінің тілшісі
«Қазақстан темір жолы» ұлттық компаниясы жыл соңына дейін 22 мыңнан астам теміржол қызметкерлерінің білімін жетілдіріп оқытады деп күтілуде.
Бүгінгі күнге дейін Астанадағы Теміржол көлігі персоналын дамыту және бағалау орталығында және өңірлік оқу орталықтарында 14 мыңнан астам адам оқудан өткен. Халықаралық стандарттардың барлық заманауи талаптарына жауап беретін Астанадағы оқу орталығы теміржолшылардың білім-біліктілігін арттыруда он жылдан бері табысты жұмыс істеп келеді. Орталық мамандарының айтуынша, олар әзірлеген кәсіби даму және персоналдың біліктілігін арттыру бағдарламалары «ҚТЖ» ҰК» АҚ компаниялар тобының өндірістік-технологиялық процесінің қажеттіліктеріне бейімделген. Соңғы жылдардағы оқиғаларға байланысты қашықтықтан оқыту мен тестілеудің жаңа жүйесі енгізілуде. Еңбекті қорғау және қауіпсіздік техникасы, өнеркәсіптік қауіпсіздік, экологиялық қауіпсіздік, өрт-техникалық минимум, электр қауіпсіздігі тақырыптарында, сондай-ақ теміржол көлігінің 150-ден астам мамандығын даярлау және біліктілігін арттыруға қатысты сабақтар өтеді.
«ҚТЖ» ҰК» АҚ басшылары, жетекші мамандары және өндірістік персоналдардан бөлек орталық базасында таяу шет елдердің өкілдері де білім алуда. Мәселен, осы жылдың қыркүйек айында Молдова темір жолынан ТЭ33А сериялы тепловоз машинистері үшін біліктілікті арттыру курсы өткізілсе, қазан айында Әзербайжан темір жолдары қызметкерлерін қазақстандық электровоздарды басқаруға үйрету жоспарланған.