Медициналық пойыздар ауыл тұрғындары арасында жиі кездесетін ауруларды анықтады

«Самұрық-Қазына» Қорының бүгінгі баспасөз жиынында «Samruk-Kazyna Trust» әлеуметтік жобалар дамыту қорының бас директоры Альфия Адиева шалғай жатқан ауыл тұрғындары арасында жиі кездесетін ауруларды атады.

Оның айтуынша, халық көп жүгінген тізімге онкологиялық және жүрек-тамыр аурулары (инсульт), асқазан-ішек жолдарының аурулары (созылмалы панкреатит, созылмалы холецистит), буын аурулары (артроз және артрит), тері және аллергиялық аурулар (аллергиялық дерматит, липома), сондай-ақ қант диабеті мен глаукома кірген.

Ең сұранысқа ие мамандардың қатарында жалпы тәжірибелік дәрігер, невропатолог, офтальмолог, ЛОР дәрігері мен хирург бар. Сұранысқа ие процедуралар ультрадыбыстық зерттеу, ЭКГ және флюорография болған.

«Жәрдем» және «Саламатты Қазақстан» медициналық пойыздарының дәрігерлері биыл 14 облыстағы 147 станцияда алты ай жұмыс істеп, 80 мың отандасымызға көмек көрсетті.  

"Бұл жоба алғаш рет 2010 жылы іске қосылып, осы кезең ішінде Денсаулық, Жәрдем және Саламатты Қазақстан атты үш консультациялық-диагностикалық пойыз еліміздің шалғайындағы 1 800-ден астам елді-мекенді аралады. Сапар барысында 575 мыңнан астам тұрғынды тексерістен өткізіп, 2 млн-ға жуық диагностикалық ем шара, 17 мыңнан аса кіші амбулаториялық ота жасады", - деді Альфия Адиева.