Елдің мазасын алған жолаушы пойыздан түсірілді
Ақтөбе облысы бойынша меншікті тілші
«Орал-Алматы» бағытындағы жолаушылар пойызынан 31 жастағы жолаушы түсірілді. Қостанайлық азамат жол бойы сапарластарының мазасын алып, қоғамдық тәртіпті бұзған.
Оқиға Никельтау станциясында тіркелді. Көлік полицейлерінің мәліметінше, ер адам жол бойы ішімдік ішіп, айналасындағылардың мазасын алған. Жолаушылардың талабын назарға алған жолсеріктер желілік тәртіп сақшыларын шақырған.
«Медициналық куәландыру қорытындысына сәйкес ер адам «жеңіл дәрежедегі» масаң күйде болған. Шешім қабылдау үшін ұсақ бұзақылық бойынша Қостанай қаласының әкімшілік құқық бұзушылықтар жөніндегі мамандандырылған ауданаралық сотына материал жіберілді», – дейді Көліктегі полиция департаментінің баспасөз қызметі.
Айта кетейік, құқықбұзушыға қатысты ҚР ӘҚБтК 440-бабының 1-бөлігімен шара қолданып, оған қатысты 5 АЕК көлемінде айыппұл салынған. Жыл басынан көлік полицейлері еліміздің түрлі аумағындағы теміржол бойында тәртіп бұзған 37 744 азаматты әкімшілік жауапкершілікке тартқан. Оның ішінде қоғамдық орында ішімдіктер ішіп және масаң күйде келгені үшін – 3 859, өзге де ұсақ бұзақылықтар үшін 523 адам жауапқа тартылған.